Адыгеим и ЛIышъхьэу КъумпIыл Мурат АР-м и Правительствэ и Унэ тыгъуасэ зэIукIэгъу щыдыриIагъ УФ-м и Къэралыгъо Думэ идепутатэу, партиеу «Единэ Россием» и Феде­ральнэ партийнэ проектэу «Цифрэ Урысыер» зыфиIорэм икоординаторэу Антон Немкиным.

Республикэм цифрэ технологиехэмкIэ иIофхэм язытет ахэр тегущыIагъэх. Антон Немкиным къызэрэхигъэщыгъэмкIэ, партийнэ проектым ипхырыщын республикэм ихэхъоныгъэ кIо­чIакIэ къыхилъхьащт. КъэбарлъыгъэIэс технологиехэм япхыгъэ лабораториехэр зэхэщэ­гъэнхэмкIэ, лъэныкъо зэфэ­шъхьафхэмкIэ проектхэр тестировать шIыгъэнхэмкIэ Адыгеир гугъапIэхэр къэзытырэ шъо­лъырхэм ащыщ.
КъумпIыл Мурат къызэрэхигъэщыгъэмкIэ, партиеу «Единэ Россиер» кIэщакIо зыфэхъурэ Iофтхьэбзэ пстэуми респуб­ликэм ипащэхэр ахэлэжьэнхэм фэхьазырых. ЦIыфхэм апае игъом ыкIи тэрэзэу къэралыгъо фэIо-фашIэхэр зэшIохы­гъэнхэмкIэ, пэщэныгъэ зехьэгъэнымкIэ, бизнесым иIофы­гъохэр гъэцэкIэгъэнхэмкIэ ащ мэхьэнэ гъэнэфагъэ иIэу щыт.
Республикэм къэбарлъыгъэ­Iэс технологиехэмкIэ икуп гъэ­нэфагъэхэм ялIыкIохэр хэла­жьэхэзэ нахь игъэкIотыгъэу циф­ровизацием ахэр тегущы­Iагъэх. АР-м и ЛIышъхьэ и Ко­ординационнэ гупчэ зэIукIэгъур щыкIуагъ. Iофтхьабзэр къызэ­Iуихызэ республикэм и ЛIы­шъхьэ къызэрэхигъэщыгъэмкIэ, цифрэ технологиехэр лъэпкъ хэхъоныгъэм игухэлъ шъхьаIэ­хэм япхыгъэх, Урысыем и Пре­зидентэу Владимир Путиным къыгъэуцурэ пшъэрылъхэм ар ащыщ. Хэгъэгум итехнологи­ческэ суверенитет щыIэнымкIэ, инновациехэм хэхъоныгъэ ашIы­нымкIэ, «искусственнэ интел­лек­т-
кIэ» заджэхэрэм итехнологиехэр гъэфедэгъэнхэмкIэ ама­лышIоу ар плъытэн плъэкIыщт.
«Урысыем и Правительствэ иIэпыIэгъу хэлъэу Адыгеим экономикэмрэ социальнэ лъэныкъомрэ къахиубытэхэрэм цифровизациер ащэкIо. Псауныгъэм икъэухъумэн, гъэсэ­ныгъэм, культурэм, спортым, унэ-коммунальнэ хъызмэтым ыкIи псэолъэшIыным игъэкIо­тыгъэу цифрэ технологиехэр ащагъэфедэхэ хъугъэ. Ащ къы­хэкIэу лъэныкъо зэфэшъхьафхэм нахь шIуагъэ къатэу мэхъу, цIыфхэми ящыIакIэ нахь зы­къеIэты», — къыIуагъ КъумпIыл Мурат.
Адыгеим социальнэ мэхьанэ зиIэ псэуалъэу итхэр зэкIэ псынкIэу бэ къызэлъызыубытын зылъэкIыщт интернетым епхыгъэх. ПсэупIи 150-рэ фэдизмэ ащ фэдэ амал яIэ хъугъэ, псэупIэ 220-рэ мобильнэ хъытыум пышIагъэх. Республикэм щыпсэухэрэр къэралыгъом къы­тырэ электрон сервисхэм на­хьыбэу яуталIэхэ хъугъэ ыкIи ахэр къызфагъэфедэх. Илъэсэу икIыгъэм электрон шIыкIэм те­тэу къэралыгъо ыкIи муниципальнэ фэIо-фашIэхэм япхыгъэ лъэIу тхылъ миллион 1,6-м ехъу къаIэкIэхьагъ.
Антон Немкиным ипсалъэ къызэрэщыхигъэщыгъэмкIэ, шъолъырхэм яцифрэ трансформациекIэ Адыгеир анахь пэ­рытныгъэ зыубытхэрэм ащыщ. Къэ­ралыгъо гъэIорышIэнми циф­рэ технологиехэр нахь щагъэфедэхэ хъугъэ.
«Тэ къыдгурыIон фае цифрэ технологиехэм, цифрэ трансформацием яфэмэ-бжьымэ цIыфхэм ящыIакIэ зэрэтырихьэ­рэр, къэбар шъыпкъэр ыкIи зигъор ахэм тэрэзэу аIэкIэхьанымкIэ амалышIухэр къэзытырэ лъэныкъохэм ар ащыщ. Ежь къэралыгъо къулыкъухэми яIоф­шIэнкIи цIыфхэм ящыIакIэ нахь анаIэ тырагъэтынымкIи ащ гугъэпIэ гъэнэфагъэхэр къетых, — къыIуагъ Антон Немкиным. — Партийнэ проектым изэхэгъэуцон Iоф датшIэ зэхъум тыкъызыпкъырыкIыгъэр тыкъыз­факIо тшIоигъо гухэлъхэр ары. ЦIыфхэм цифровой технологиехэм нахь хэшIыкI фыряIэныр, хэбзэгъэуцугъэри джырэ уахътэм диштэрэ шIыкIэ амалхэм атетэу гъэпсыгъэныр, шъолъырыкIэхэм цифрэ технологиехэр аIэ къырагъэхьанхэр ыкIи социальнэ проектхэм язэшIохынкIэ икъоу ахэр гъэфедэгъэнхэр».
Адыгэ Республикэм иминист­рэхэм я Кабинет и Тхьаматэ игуадзэу — АР-м цифрэ хэ­хъоныгъэмкIэ, къэбар ыкIи телекоммуникационнэ технологие­хэмкIэ иминистрэу Шыу Заурбек республикэм ицифровой трансформацие фэгъэхьыгъэу къыIотагъ.
АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель цифрэ технологиехэм зягъэушъомб­гъугъэным пае кадрэхэм ягъэхьазырын фэгъэхьыгъэу къыIотагъ.
ЗэIукIэгъум икIэуххэр зэфи­хьысыжьхэзэ, Адыгеим и ЛIы­шъхьэ къызэрэхигъэщыгъэмкIэ, партиеу «Единэ Россием» ипро­ектэу «Цифрэ Урысыер» зыфиIорэм ипхырыщын цIыф пстэуми Iэрыфэгъу къызэра­фэ­хъущтым, цифрэ шъолъыр зыкI республикэм щызэхэщэ­гъэнымкIэ ишIуагъэ къызэрэкIощтым ицыхьэ телъ.
Ащ нэужым КъумпIыл Мурат­рэ Антон Немкинымрэ пар­тиеу «Единэ Россием» общественнэ IэпыIэгъу етыгъэнымкIэ и Штаб щыIагъэх. Адыгеим и ЛIышъхьэу КъумпIыл Мурат пшъэрылъ зэрафишIыгъэм тетэу мы илъэсым икъихьэгъум ар зэхащэгъагъ цIыфхэм яшIоигъоныгъэхэр, ялъэIу тхылъхэр къэугъоигъэнхэм, зэхэфыгъэнхэм ыкIи ахэм къыдалъытэрэ Iофыгъохэр зэшIохыгъэнхэм апае. Штабым щэкIох зэIукIэгъухэр, къэгъэ­лъэгъонхэр, семинархэр, курс зэфэшъхьафхэр, общественнэ организациехэм яегъэджэнхэр, хэушъхьафыкIыгъэ дзэ операцием хэлажьэхэрэм яунагъохэм адыряIэрэ зэIукIэгъухэр.
Республикэм и ЛIышъхьэ партийнэ проектым икоординатор игъусэу АР-м шъолъырым пэщэныгъэ дызехьэгъэнымкIэ и Гупчэ иIофшIакIэ зыщагъэгъозагъ, къэралыгъо фондэу «Хэгъэгум иухъумакIохэр» зыфи­Iорэм ишъолъыр къутами щы­Iагъэх.
Боксер
ныбжьыкIэхэм аIукIагъэх
Адыгеим и ЛIышъхьэу КъумпIыл Муратрэ УФ-м и Къэралыгъо Думэ идепутатэу, боксымкIэ спортым имастерынымкIэ кандидатэу Антон Немкинымрэ къалэу Мыекъуапэ игурыт еджапIэу N 7-м боксым-
кIэ изалэу хэтым щыIагъэх. А. Немкиныр еджапIэм чIэс зэхъум ащ кIощтыгъ.
Депутатыр тренерэу иIэгъэ Владимир Овчинниковым, боксер ныбжьыкIэхэми гущыIэгъу афэхъугъ. Непэ ахэр агъэкIэ­жьыгъэ залым ягуапэу къекIуа­лIэх. ГъэхъэгъэшIухэр ашIынхэу кIэлэцIыкIухэм А. Немкиныр афэлъэIуагъ.

«Гъогу кIыхьэм иублэгъу шъыпкъэм шъущыт. Арышъ, текIоныгъэр къыдэшъухыным игъорыгъозэ зыфэжъугъас. Спортым къиныгъохэр щыгъэзыегъэнхэмкIэ ишIуагъэ къэкIо. ТапэкIи гъогоу хэшъухыгъэм исыд фэдэрэ лъэныкъуи гъэ­хъагъэ щышъушIынымкIэ ащ ишIуагъэ къышъокIыжьыщт!», — къыIуагъ Антон Немкиным.
КъумпIыл Муратрэ Антон Немкинымрэ тренерхэм, боксымкIэ республикэм и Феде­рацие ипащэхэм ягъусэхэу мы спорт лъэпкъым хэхъоныгъэ ышIынымкIэ пшъэрылъэу ыкIи гугъапIэу щыIэхэм атегущыIагъэх.
Адыгэ Республикэм физическэ культурэмкIэ ыкIи спор­тымкIэ и Комитет къызэритыгъэмкIэ, республикэм мы аужырэ илъэсищым боксымкIэ зали 7 къыщызэIуахыгъ, спорт еджапIэхэм ыкIи кIэлэцIыкIу-ныб­жьыкIэ спорт еджапIэхэм защызгъэсэрэ боксерхэм япчъагъэ фэдизрэ ныкъорэкIэ на­хьыбэ хъугъэ, пстэумкIи нэбгырэ 800-м непэкIэ ехъу. Адыгэ Республикэм испортсменхэр илъэс къэс Урысыем ихэшы­пыкIыгъэ командэхэм ахэхьэх.

А IофшIэным иIахьышхо хе­шIыхьэ Адыгэ Республикэм боксымкIэ и Федерацие. 2020-рэ илъэсым къыщыублагъэу боксым хэхъоныгъэ егъэшIы­гъэнымкIэ ыкIи зэлъягъэшIэгъэ­нымкIэ бюджетым къыхимыубытэрэ сомэ миллион 60-м ехъу къызфагъэфедэн алъэкIыгъ. Ахъщэр зыпэIуагъэхьагъэр: гурыт еджапIэу N 7-м испортивнэ зал зэтегъэпсыхьэгъэныр, тренерхэмрэ кIэлэегъаджэ-­
хэмрэ мылъкукIэ кIэгъэгушIу­гъэнхэр, официальнэ спортивнэ зэнэкъокъукIэ алъытэхэрэм ахэ­лэжьэнхэр, спорт Iэмэ-псы­мэхэмкIэ зэтегъэпсыхьэгъэнхэр ыкIи нэмыкIхэр.
2023-рэ илъэсым икIэуххэм нафэ къызэрашIыгъэмкIэ, боксымкIэ я IV-рэ Урысые форумым Адыгеим боксымкIэ и Фе­дерацие анахь шъолъыр фе­дерацие дэгъухэм ащыщэу къыщыхагъэщыгъ.
АР-м и ЛIышъхьэ ипресс-къулыкъу
къытыгъэ къэбархэмкIэ
Тхьаркъохъо Сафыет.