Пачъыхьэу я II-рэ Абдалла тетыгъор зиIыгъыр илъэс 25-рэ зэрэхъурэм ехъулIэу Иорданием икъэлэ шъхьаIэу Амман пчыхьэ­зэхахьэ щыкIуагъ. Ар зэхэзыщагъэр Иорданием и Адыгэ шIушIэ хас ары.

Пчыхьэзэхахьэм ихьэкIэ гъэшIуагъэ­хэм ащыщыгъэх Иорданием ипарла-
мент итхьаматэу Фейсал аль-Файез, парламентым хэтэу, Иорданием ипарламент иапшъэрэ палатэ исенаторэу Алия Буран, социальнэ хэхъоныгъэмкIэ министрэу Вафа Бани Мустафа, на­хьыжъхэм я Совет ипащэу Хэкужъ Хъяр­дин ыкIи нэмыкIхэр.
Фейсал аль-Файез къызэгущыIэм къызэрэхигъэщыгъэмкIэ, КъокIыпIэ Благъэм гумэкIыгъоу илъым зэрэхахъорэм емылъытыгъэу, Иорданием ипачъыхьэу я II-рэ Абдалла ишIуагъэкIэ мамырныгъэрэ зэгурыIоныгъэрэ азыфагу илъэу цIыфхэр Иорданием щэпсэух.
Иорданием и Адыгэ шIушIэ хасэ ипа­щэу Хьэлащтэ Ибрахьимэрэ нахьыжъхэм ащыщэу Хэкужъ Хъярдинрэ Адыгэ Рес­публикэм и ЛIышъхьэу КъумпIыл Мурат ишIуфэс тхылъ къеджагъэх.
Ащ мырэущтэу къыщеIо: «Адыгэхэм Иорданием лъытэныгъэ къащыфашIы ыкIи яфэшъошэ чIыпIэ ащ щаубыты. НэмыкI цIыф лъэпкъхэм афэдэу Хашимитскэ ПщыпIэр нахь зэтегъэпсыхьагъэ хъуным ахэм яIахьышIу хашIыхьэ. Урысыемрэ Иорданиемрэ язэпхыныгъэхэр гъэпытэгъэнхэм адыгэхэр фэлажьэх, тихэгъэгухэр зэзыпхырэ лъэмыджэу ахэр щытых. Культурэ-шIушIэ ыкIи сатыу-
эко­номикэ зэдэлэжьэныгъэм зегъэу­шъомбгъугъэнымкIи яшIуагъэ къагъакIо».
Джащ фэдэу КъумпIыл Мурат Па­чъыхьэу я II-рэ Абдалла ыкIи иунагъо исхэм тилъэпкъэгъухэу Иорданием щы­псэухэрэм ренэу анаIэ къазэратыра­гъэтырэм пае зэрафэразэр къыхигъэщыгъ.
Адыгэ Республикэм и ЛIышъхьэ ­джэуап тхылъэу къыфагъэхьыгъэм къы­зэрэфэразэхэм нэмыкIэу къыщеIо Иорданием ис адыгэхэр Урысые Федерациемрэ Хашимитскэ ПщыпIэмрэ язэпхыныгъэхэм ягъэпытэн тапэкIи зэрэ­фэлэжьэщтхэр.
Шъугу къэтэгъэкIыжьы: 2019-рэ илъэ­сым Адыгеим илIыкIо куп Иорданием щыIагъ. Ордэунэу «Аль Хуссейн» зыфи­Iорэм пачъыхьэм щыригъэблэгъагъэх АР-м и ЛIышъхьэу КъумпIыл Муратрэ республикэм иминистрэхэм я Кабинет хэтхэмрэ. Хашимитскэ ПщыпIэм ипащэ къыIуагъ Адыгеим IофшIэным епхыгъэ ыкIи блэгъэныгъэ фыщытыкIэхэу дыряIэхэр гъэпытэнхэм, Иорданием ис адыгэхэмрэ ятарихъ Хэкужърэ язэпхыныгъэ джыри нахьышIу хъунымкIэ ишIуа­гъэ къыгъэкIоным зэрэфэхьазырыр.
Адыгеим илIыкIохэр Иорданием зыщэIэхэм ащ иIофышIэ купхэр, бизнесым пылъхэр нэIуасэ афашIыгъэх респуб­ликэм а лъэныкъомкIэ амалэу иIэхэм, тилъэпкъэгъухэу ащ щыпсэухэрэм ялIыкIохэми гущыIэгъу афэхъугъэх.
АР-м и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.