ЛъэгэпIэшIухэм анэсынэу тыщэгугъы
Адыгэ Республикэм щыщ Евгений Латышонок Урысыем икомандэ анахь лъэшхэм ащыщэу «Зенит» зыфиIорэм зэзэгъыныгъэ дишIыгъ ыкIи ащ икъэлэпчъэIут хъугъэ.
Зичэзыу илъэсыкIэ ешIэгъоу рагъэжьагъэм тичIыпIэгъу футболистыр Санкт-Петербург икомандэ гъогогъуитIо фешIагъ ыкIи зэ нымыIэми икъэлапчъэ Iэгуаор къыдаригъэдзагъэп. Ащ фэдэ егъэжьапIэр дэгъу дэдэу плъытэн фае.
Евгений Латышонок мэкъуогъум и 21-м, 1998-рэ илъэсым Адыгеим ит псэупIэу Джаджэм къыщыхъугъ. Ащ иапэрэ тренерэу Александр Вольвач къеIуатэ: «2009-рэ илъэсым гъэмафэм Жене республикэ футбол еджапIэм къэкIуагъ ыкIи ипсынкIагъэкIэ игуетыныгъэкIэ илэгъухэм къахэщыгъ. Илъэс тешIагъэу къэлапчъэм Iууцуагъ ыкIи къэгъэлъэгъон дэгъухэм къафэкIуагъ».
Краснодар краим ипервенствэ хэлажьэзэ джырэ уахътэ зэлъашIэрэ командэу «Краснодар» зыфиIорэм иакадемие итренерхэм гу къылъатагъ ыкIи мыщ щеджэнэу рагъэблэгъагъ. Ащ гъэхъэгъэшIухэр щишIыгъэх, сэнаущыгъэ зыхэлъ къэлэпчъэIутхэм ясатырэ хэуцуагъ.
Клубым иныбжьыкIэ ыкIи инэмыкI командэхэм защешIэ нэуж, 2019-рэ илъэсым, Евгений Латышонок «Балтикэм» зэзэгъыныгъэ дишIыгъ ыкIи илъэс пчъагъэхэм къакIоцI ащ фешIагъ. 2024-рэ илъэсым «Зенит» щыщ хъугъэ, Санкт-Петербург икомандэ 2029-рэ илъэсым нэс фешIэнэу зэзэгъыныгъэм кIэтхагъ.
Евгений тапэкIи гъэхъэгъэшIухэр ышIынхэу, джыри нахь лъэгэпIэшIухэм анэсынэу фэтэIо, Адыгеим зэрэщыщым тырэгушхо.