Непэ — зи Хэкужъ къэзыгъэзэжьыгъэм и Маф
Адыгэ Республикэм щыпсэухэу
лъытэныгъэ зыфэтшIыхэрэр!
ТичIыпIэгъу лъапIэхэр!
Зи Хэкужъ къэзыгъэзэжьыгъэм и Мафэ фэшI тышъуфэгушIо!
Адыгэ лъэпкъым изыкIыныгъэ, Адыгэ Республикэм икультурнэ-тарихъ кIэн бай дэдэр, зэдэIэпыIэжьныгъэм ихэбзэ шIагъохэу лIэшIэгъубэхэм тхэлъыгъэхэр къэухъумэгъэнхэм итамыгъэу щыт мы мафэр.
1998-рэ илъэсым шышъхьэIум и 1-м щыIэгъэ хъугъэ-шIагъэхэр а хэбзэ дахэхэм яшыхьатхэу плъытэн плъэкIыщт. Урысые Федерацием ипащэхэм дипломатическэ ыкIи политическэ Iофышхоу зэрахьагъэм ишIуагъэкIэ заом зэлъиубытыгъэ Автоном краеу Косовэ щыпсэурэ адыгэхэм яапэрэ куп ятарихъ ЧIыгужъ къащэжьын алъэкIыгъагъ.
Адыгеим щыпсэурэ цIыфхэу лъэпкъ зэфэшъхьафхэм къахэкIыгъэхэм а лъэхъаным гукIэгъу къызыхагъэфэгъагъ, ятарихъ ЧIыгужъ тилъэпкъэгъухэр хэгъозэжьынхэмкIэ яшIогъэшхо арагъэкIыгъ. Къэкощыжьыгъэхэм къуаджэу афашIыгъэм «МэфэхьаблэкIэ» еджагъэх. Тилъэпкъэгъухэу къэкIожьыгъэхэр амал зэриIэкIэ нахь псынкIэу социальнэ, культурнэ лъэныкъомкIэ къызыхэхьажьыгъэхэм ахэгъозэжьынхэмкIэ Iофышхо зэхэщагъэ хъугъагъэ.
Непэ Урысыем ицIыф хъугъэ тилъэпкъэгъухэм Адыгэ Республикэм ыкIи зэрэхэгъэгоу яхэхъоныгъэ яфэшъошэ Iахь хашIыхьэ. Лъэныкъо зэфэшъхьафхэм гъэхъагъэ хэлъэу ахэр ащэлажьэх, ныдэлъфыбзэр, тарихъыр ыкIи культурэр къэухъумэгъэнхэм афэгъэхьыгъэ Iофтхьабзэхэм, лъэпкъым ижъыкIэ къыщегъэжьагъэу хэлъыгъэ цIыфыгъэ шэпхъэ дахэхэм атетэу ныбжьыкIэхэр пIугъэнхэм, лъэпкъ зэфэшъхьафхэм къахэкIыгъэхэу дин зэмылIэужыгъохэр зылэжьхэрэм азыфагу зэгурыIоныгъэ илъыным яIахь хашIыхьэ.
Къэзгъэзэжьыгъэхэм правовой, зэхэщэн ыкIи къэбарлъыгъэIэс амалхэр ягъэгъотыгъэнхэм пае Адыгэ Республикэм икъэралыгъо программэу «IэкIыб къэралхэм ащыпсэурэ тилъэпкъэгъухэу ежьхэм яшIоигъоныгъэкIэ Адыгэ Республикэм къэкощыжьыхэрэм IэпыIэгъу ятыгъэныр» зыфиIорэр аштагъ ыкIи гъэхъагъэ хэлъэу щыIэныгъэм щыпхыращы.
Программэм къыдыхэлъытэгъэ Iофтхьабзэхэу зэрахьэхэрэм зи Хэкужъ къэзгъэзэжьыгъэхэр нахь псынкIэу урысые обществэм хэгъозэжьынхэмкIэ яшIуагъэ къызэрэкIощтым тицыхьэ телъ.
Мэхьанэшхо зиIэ мы мафэм зэкIэ республикэм щыпсэухэрэм, IэкIыб къэралхэм арыс адыгэхэм тафэлъаIо тшIоигъу псауныгъэ пытэ яIэнэу, Адыгеим ыкIи зэдытие Хэгъэгушхом щыIакIэу арылъыр нахьышIу хъуным фытегъэпсыхьэгъэ Iофхэм гъэхъагъэхэр ащашIынхэу!
Адыгэ Республикэм и ЛIышъхьэу, Урысые политическэ партиеу “Единэ Россием” и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр