Адыгеим и ЛIышъхьэу КъумпIыл Мурат кIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение Первых» зыфиIорэм дэлэжьэгъэнымкIэ АР-м и ЛIышъхьэ дэжь щызэ­хэщэгъэ Координационнэ советым иигъэкIотыгъэ зэхэсыгъо зэрищагъ.

Зэхэсыгъом хэлэжьагъ шъолъыр зэ­дэлэжьэныгъэмкIэ Департаментым ипа­щэу Ксения Яновар.
Адыгеим и ЛIышъхьэ ишIуфэс псалъэ къыщыхигъэщыгъ урысые движением ипащэхэм республикэм ренэу анаIэ къызэрэтырагъэтырэм пае зэрафэразэр, ныбжьыкIэ политикэм республикэм хэхъоныгъэ щишIынымкIэ ащ фэдэ зэ­дэлэжьэныгъэм ишIуагъэ къызэрэкIорэр, Владимир Путиным къыгъэуцурэ пшъэ­рылъхэр нахь шIогъэ ин къатэу зэшIохыгъэнхэмкIэ ар амал дэгъоу зэрэщытыр.
«Тэ ткIуачIэ зэтхьылIэрэр кIэлэцIыкIухэмрэ ныбжьыкIэхэмрэ нахь зыкъызэIуахыным пае ящыкIэгъэ амалхэр ядгъэгъотынхэр ары. Ти­кIэлэцIыкIухэр республикэм ищыIакIэ нахь игъэкIотыгъэу хэщэгъэнхэм, ежьхэри обществэм зэрищыкIагъэхэр зэхашIэным, тигупсэ республикэ ахэр кIэщакIо зыфэхъу­хэрэр къызэришъхьапэщтхэр агурыдгъэIоным тыдэлажьэ», — ­къыIуагъ АР-м и ЛIышъхьэ.
КъумпIыл Мурат къызэрэхигъэщы­гъэмкIэ, лъэныкъуабэ къызэлъызыубытырэ IофшIэн республикэм щэкIо: ныбжьыкIэ куп зэфэшъхьафхэр, граждан обществэм иинститутхэр, дин ыкIи общественнэ организациехэр, бизнесыр ыкIи нэмыкI купхэр ащ къызэлъеубытых. КIэлэцIыкIухэм Iоф адэшIэгъэнымкIэ анахь мэхьанэ зиIэхэм ащыщ гъэсэ­ныгъэр.
ПIуныгъэ IофшIэным диштэу волонтер ыкIи патриот движением нахь зятэгъэгъэчаны. Фондэу «Хэгъэгум иухъума­кIохэр» зыфиIорэм тыдэлажьэ, тызэгъу­сэу Iофтхьабзэхэр зэшIотэхых, хэушъхьа­фыкIыгъэ дзэ операцием хэлажьэхэрэри ахэм къятэгъэблагъэх.
«Адыгеим иныбжьыкIэхэр шIуагъэ зыпылъ Iофтхьэбзэ гъэшIэгъоныбэмэ кIэщакIо афэхъух. Ахэм тадеIэным ренэу тыфэхьазыр, шIыкIэ амал зэфэшъхьафхэр ащкIэ тэгъэфедэх, яшIоигъоны­гъэхэр щыIэныгъэм гъэцэ­кIагъэ зэрэщы­хъущтхэ лъэныкъо зэфэ­шъхьаф­хэр къыдэтэлъытэх. Гу­щыIэм пае, ныбжьыкIэ хэушъхьафыкIыгъэ гупчэхэр зэхэтэщэх. Ахэм зыкIэ ащыщ сэнаущыгъэ зыхэлъ ныбжьыкIэхэм я Шъо­лъыр слетэу «Фыщт» зыфиIорэр. Илъэсэу икIы­гъэм апэрэу тирес­публикэ щыкIуагъ шъолъыр фору­мэу «Адыгеим иныбжьыкIэхэр» зыфиIорэр. Ащ нэбгырэ 500 фэдиз хэлэжьагъ. Зэрэхэгъэгоу тыригъусэу Урысыем щыпсэурэ цIыф лъэпкъ зэфэшъ­хьафхэмкIэ анахь лъапIэу щыт шэн-­хабзэхэр IэубытыпIэ тшIы­хэзэ, зы ныбжьыкIэ шъо­лъыр дгъэпсыным ыуж тит. Ащ фэдэ екIолIакIэм къыдырегъаштэ кIэлэцIыкIухэмрэ ныбжьыкIэхэмрэ я Урысые движениеу «Движение Первых» зыфиIо­рэм», — къыхигъэщыгъ КъумпIыл Мурат.

Республикэм иIэшъхьэтетхэм яшIогъэшхо къагъакIо шъолъыр къутамэу «Движение Первых» зыфиIорэм IэпыIэгъу етыгъэнымкIэ. Илъэсэу икIыгъэм федеральнэ мылъкум нэмыкIэу, республикэ бюджетым сомэ миллиони 5 къыхагъэкIыгъагъ. Ахъщэр зыпэIухьагъэр кIэлэцIыкIу ыкIи ныбжьыкIэ Iофтхьа­бзэ­хэм язэхэщэн. Мы илъэсми джащ фэдэу сомэ миллиони 5 а гухэлъхэм апае ­къыхагъэ­кIыгъ.
НыбжьыкIэ движением рес­публикэм зыщеушъомбгъу ыкIи щыIэныгъэм илъэныкъо зэфэшъхьафхэр ащ къыхеубытэх. Республикэм имуниципалитет пстэуми, чIыпIэхэм яхэбзэ къулы­къухэр къадеIэхэзэ, «Движение Первых» зыфиIорэм ичIыпIэ къутамэхэр къащызэ­Iуахыгъэх ыкIи Iоф ашIэ.
«Илъэсэу къихьащтым къы­щыублагъэу лъэпкъ проектыкIэу «НыбжьыкIэхэм­рэ кIэлэцIыкIухэмрэ» зыфи­Iорэр агъэцакIэу рагъэ­жьэщт. Ащ ныбжьыкIэ политикэр лъэгэпIакIэм зэрэтырищэщтым уехъырэхъы­шэ­нэу щытэп. Лъэпкъ проектым ишIуагъэ къэкIощт ­кIэлэцIыкIухэм нахь зыкъызэIуахынымкIэ, яхэгъэгу шIу алъэгъоу ахэр пIугъэнхэмкIэ. ЕджапIэхэм ягъэкIэ­жьын, гъэсэныгъэ зыщарагъэгъотырэ учреждениехэр мылъку-техникэ лъэны­къом­кIэ нахь зэтегъэпсы­хьэгъэнхэм, экономикэм пае IэпэIэсэныгъэ ин зыхэлъ IофышIэхэр гъэхьазырыгъэнхэм, шIэныгъэлэжь ныбжьыкIэхэм IэпыIэгъу ятыгъэным ыкIи нэмыкI Iофыгъохэм язэшIохынкIэ ама­лэу тиIэри нахьыбэ хъущт. Урысыем и Президент ­игъоу ылъэгъугъэ лъэпкъ проектэу «IофышIэхэр» зыфиIорэри пхырыщыгъэным иамал ащ къытыщт», — къыIуагъ Адыгеим и ЛIышъхьэ.
Ксения Яновам «Движение Первых» зыфиIорэм респуб­ликэм ипащэхэм IэпыIэгъушхо къызэрэратырэм пае зэрафэразэр къыIуагъ.
«Илъэсэу икIыгъэм респуб­ликэм муниципальнэ координационнэ советхэр щызэхащэгъагъэх, федеральнэ лъэгапIэм тетэу нэмыкI шъолъырхэмкIэ ар щысэ ­дэгъу хъугъагъэ. Мы илъэсым къыщегъэжьагъэу шIокI зимыIэ пшъэрылъэу ар щытыщт, сыда пIомэ а IофшIэным кIэухышIоу къы­хьыгъэр тинэрылъэгъу. Движением ишъолъыр ­къутамэ мылъку-техникэ лъэныкъомкIэ ищыкIагъэр зэкIэ рагъэгъоты, кIэлэцIыкIухэм нахь шIогъэ ин хэ­лъэу Iоф адэшIэгъэным иамали ащ къеты», — къы­Iуагъ Ксения Яновам.
«Движение Первых» зыфи­Iорэм и Правление илIыкIо джащ фэдэу къыIуагъ организацием иIофшIэн илъэныкъо шъхьаIэхэмкIэ Адыгеир анахь дэгъоу зиIофшIэн зэхэзыщэрэ шъолъырхэм зэращыщыр ыкIи республикэм гъэхъагъэу иIэхэм зэрэ Урысыеу ащагъэгъозэщт.
Движением ишъолъыр къута­мэ и Совет итхьаматэу Ованес Шекерьянц къышIыгъэ псалъэм зэхэсыгъом щедэIугъэх. Ар зы­фэгъэхьыгъагъэр 2024-рэ илъэ­сым иапэрэ кIэлъэныкъо рес­публикэм щызэхэщэгъэ къута­мэм Iофэу ышIагъэр ары.
АР-м и ЛIышъхьэу КъумпIыл Мурат Iофтхьабзэу рекIокIыгъэм икIэуххэм ялъытыгъэу минис­терствэхэмрэ къулыкъухэмрэ, джащ фэдэу чIыпIэхэм япащэхэм пшъэрылъ афишIыгъ гъэпсын IофшIэнхэм мы движением хэтхэр нахь чанэу къахагъэлэжьэнхэу, шIуагъэ къэзытыщт Iофтхьэбзэ гъэшIэгъонхэр зэдызэхащэнхэу, ныбжьыкIэхэр кIэщакIо зыфэхъухэрэмкIэ аде­Iэнхэу ыкIи ахэр агъэцэкIэнхэм пае ящыкIэгъэ мылъкур аIэкIагъэхьанэу.
АР-м и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.