Хабзэ дахэ хъуауэ шыщ­хьэуIум и 1-р, Хэкум къэзыгъэзэжа адыгэхэм я махуэр, щагъэлъапIэ  Къэбэрдей-Балъкъэрым, Къэрэшей-Шэрджэсым, Адыгейм. Мы махуэр лъэпкъ махуэгъэпсым адыгэ­хэм я зы махуэ лъапIэу илъэс 25 щIигъукIэ узэIэбэ­кIыжмэ хэуващ. Ар Адыгэ Рес­публикэм къэ­рал уна­фэкIэ къищтащ 1998 гъэм. Къэбэрдей-Балъкъэрымрэ Къэ­рэшей-Шэрджэсымрэ Дунейпсо ­Адыгэ Хасэм и жэрдэмкIэ 2010 гъэ лъандэрэ щагъэлъапIэ.
Къэрал куэдым щыпсэу адыгэхэр зыхэс лъэпкъхэм пщIэ къыхуащIу, я IэщIагъэ-­щIэныгъэкIэ ехъулIэныгъэфI­хэр къагъэлъагъуэу нобэм къы­зэрысар ину ди гуапэщ. Ауэ дэнэ щIыпIэ ахэр щыпсэу­ми, сыт хуэдэ бзэкIэ мыпса­лъэми, ягури я псэри Хэку­жьым­кIэ къэгъэзащ, ар я плъапIэу мэпсэу.
Мы лъэхъэнэм Тыркум, Си­рием, Иорданием, Израилым, Европэм хыхьэ къэ­рал­хэм, Америкэм и Штат Зэгуэт­хэм, Косовэ, нэгъуэщIщIыпIэ­хэми къиIэпхъу­кIыжауэ Къэ­бэрдей-Балъкъэрым цIыху 3000 щопсэу, Адыгэ Респуб­ликэмк1э зыгъэзахэм я бжыгъэр 2000-м ноблагъэ, Къэрэшей-Шэрджэсым цIыху 34 щыIэщ.
Къыздихьэжа лъахэм щызе­кIуэ къэрал хабзэхэр ягъэзащIэу, Хэкум и зыужьыныгъэм псэемыблэжу хуэлажьэ защIэщ ахэр. Абыхэм республи­кэм ще­кIуэкI гъащIэм, экономикэм, щIэныгъэм, щэнха­бзэм, егъэ­джэныгъэм, меди­ци­нэм, нэ­гъуэщI IэнатIэхэми хэлъхьэныгъэ ин хуэ­зыщIхэр яхэтщ. 
Къэрал къулыкъущIапIэхэми лъэкI къагъанэркъым хамэщI­къикIыжа ди лъэпкъэгъуэхэр щIыпIэм хэгъэсыхьыжынымкIэ, я псэукIэр егъэфIэкIуэнымкIэ.
Хэкум къэзыгъэзэжа адыгэ­хэм я махуэр лъапIэщ ди дежкIи къэзыгъэзэжахэм я дежкIи. Дуней  псом дыщикъу­хьами, нобэкIэ дызэрыщIэну, дызэрыгъуэтыну Iэмал гъуэзэ­джэхэр диIэ хъуащи, ари фIыщ. Уи гуапэ мыхъу къанэр­къым хамэ къэрал щыпсэу ди лъэпкъэгъухэр хуэм-хуэмурэ адэжь щIыналъэмкIэ къызэ­реIэр щыплъагъукIэ. Сыхуейт апхуэдэхэм я бжыгъэр нэхъри хэхъуэну.
ПщIэ зыхуэсщI си къуэшхэ, си шыпхъухэ!
Дунейпсо Адыгэ Хасэм и ГъэзэщIакIуэ гупми сэри къыз­бгъэдэкIыу гуапэу сынывохъуэ­хъу Зи хэку къэзыгъэзэжа адыгэхэм я махуэмкIэ.
Узыншагъэ быдэ, гъащIэ мамыр, ехъулIэныгъэ диIэну, лъэпкъым къыхуэщхьэпэн Iуэху куэд длэжьыну! Дыщыпсэу къэралыр зэредгъэ­фIэкIуэнум дыхущIэкъуу, ди нэхъыжьыфIхэм яхуэфащэу дыпсэуну.
Къеблэгъэжахэр адыгэ щIы­налъэм лъэ быдэкIэ щыувыну, щыбэгъуэну! Тхурехъу нобэрей махуэр угъурлы! 
ИрефIакIуэ лъэпкъхэм  яку дэлъ зэныбжьэгъугъэр!
Дунейпсо Адыгэ Хасэм и Тхьэмадэ
Сэхъурокъуэ Хьэутий