Мы илъэсым тигъэмафэ фабэрэ ТыгъэрэкIэ тигъэхъопсагъэп, аужыпкъэм, тфэмылъэ­кIыжьэу, хьаку плъыгъэ мэшIошхом тыхэтым фэдагъ бэдзэ­огъур. Джы шы­шъхьэIу ящэнэрэ мазэр, апэритIум
яшъхьэтеIулIэжьыр, пщыцIэу — Августыр къыгъэшъыпкъэ­жьэу, зыгу зыкIуачIэу, илъэ­шыгъэ кIигъэтхъэу зэрэщытыщтым уегупшысэжьынэу щытэп. Бэмэ Тыгъэр, псыр, гъэмэфэжьыр пIомэ, зашIэжьырэп, ау фабэу, мыжъор зыщыстэу, псыр къызщыжъоу, Тыгъэр узэхилыпкIыхьэу гуегъунчъэм, гур псынкIэу ащэкIы. ЧIыопсыми, щыIэныгъэми, цIыфхэми егъэлыегъащэр агу фаштэрэп, зэ­кIэм­кIи зы зэдэштэныгъэ гоIугъэ ахэлъ зыхъукIэ ары узыфикъудыеу, уемызэщэу, ренэу узызфищэрэр.
Ау тигъэмафэ непэрэмкIэ шы емылычым рихьыжьагъэм фэд; плъыр-стырхэр градус
35-м блифи, градус 40-м ыкIи на­хьыбэм рифылIэгъагъ. Мафэр хэгъэкIи, чэщхэри гопэ-­гочэгъу зэпымычыжьых, кIыма­фэр «пшIо­пырацэмэ», гъэмафэр — фэбэ телыгъукI зэкIэмыкIожь. Тинасыпмэ, шышъхьэIур тIэкIу нахь зыфэсакъыжь-зыгъэшIожь чъыIэтэгъэн, ощх шъабэхэри къы­хафэу, хэтрэ псэ зыпыти — цIыфи, нэмыкIи тынэ къыримыфыпэу, къытфэсакъын. Тэгугъэ, тишIоигъоныгъэ къыгъэ­шъыпкъэжьынэу.
Сыдми, гъэмафэр охътэ пшыс: чъыгхатэхэр пкIышъхьэ-­мышъхьэхэм зэлъапкIэ, тишъоф­хэм лэжьыгъэ зэфэшъхьафхэр — коцыр, хьэр, тыгъэ­гъазэр, натрыфыр ащаIуахыжьы, аузэ, тигъомылэпхъэ кон къау­шъэ. ХэтэрыкIхэр пIонышъ — щыбжьый стыри, IэшIуи, ини, нашэ-­хъырбыдзхэри, бжьын-­бжьы­ныфхэри, къон зэфэшъхьаф­хэри, картофри — къэупчъынкIэ баIох — къызэлъыхъугъэхэшъ витаминкIэ зытыушъэныр ищыкIагъ, фабэм ткIэхихыгъэр бжы­хьэ дышъэм къытитыжьыщт.
Н. Дзэукъожь.