Культурэмрэ творчествэмрэкIэ Дунэе фестивалэу Тыркуем щыкIорэм, къалэу Истамбыл ипащэхэм зэрэрагъэблэгъагъэм тетэу, адыгэ къэшъокIо ансамблэу «Абрекхэр» хэлажьэ. Хэгъэгу 30-м ехъумэ ялIыкIохэм чIыпIэ дахэхэр арагъэлъэгъущт, къэгъэлъэгъонхэр афызэхащэщт, цIыф цIэрыIомэ аIукIэщтых, IофшIэкIэшIоу аIэкIэлъ хъугъэмкIэ зэхъожьыщтых.

Бэдзэогъум и 24-м къыщегъэжьагъэу шышъхьэIум и 4-м нэс Iофтхьабзэр кIощт. Дунаир мамырэу псэуным фэгъэ­хьыгъэ фестивалэу Истамбыл щызэхащагъэм лъэпкъ къашъохэр къыщашIыщт, орэдхэр къыщаIощт. ЦIыф лъэпкъхэм якультурэ къэухъумэгъэнымкIэ ыкIи хэхъоныгъэ егъэшIыгъэнымкIэ, къошныгъэ зэфыщытыкIэр гъэпытэгъэнымкIэ мыщ фэдэ Iофтхьабзэхэм мэхьэнэшхо яI. Адыгеим икъэшъокIо куп мы мэфи­тIум фестивалым чанэу зыкъыщигъэлъэ­гъуагъ. Iофтхьабзэм хэлэжьэрэ къэшъуа­кIохэмрэ орэдыIохэмрэ нэIуасэ зэфэшIыгъэнхэм епхыгъэ зэIукIэхэр рагъэ­кIокIыгъэх.

Ансамблэу «Абрекхэм» ихудожественнэ пащэу, Адыгеим культурэмкIэ изаслуженнэ артистэу ТхьакIумэщэ Налбек телефонымкIэ тыдэгущыIагъ:
— Адыгеир тилъэпкъ къашъо­хэмкIэ дунаим щызэлъядгъашIэ тшIоигъоу лъэшэу тиIоф тегугъу, къэшъокIо купым хэтхэми ягулъытэ мы лъэныкъомкIэ къы­зэрэтIэтыщтым тынаIэ тет. Дунаим мамырныгъэ илъэу цIыфхэр псэунхэр анахь шъхьаIэу щыт. Къашъом ыбзэ цIыфхэр зэрепхых. Фестивалым лъэпкъхэр зэфищагъэх, зэIукIэгъухэр шIукIэ тыгу къэкIыжьыщтых, зэхэщакIохэм яшIушIагъэ тщы­гъуп­шэщтэп, — къытиIуагъ ТхьакIумэщэ Налбек.
Фестивалым изэфэшIыжьын тегъэ­псыхьагъэу Истамбыл исценэ къэгъэлъэ­гъонхэр щыкIощтых, гала-концертым тиансамблэ къашъохэу «Лъэпэрышъор», «Щэщэныр», хореографическэ композициеу «Си Адыгей» зыфиIохэрэр къыщигъэлъэгъощт. Пчыхьэзэхахьэм адыгэ джэгу къыдыхэлъытэгъагъ.
Iофтхьабзэм хэлэжьагъэхэр зыщыщ лъэпкъымрэ бзэу аIулъымрэ ямылъытыгъэу къэшъоным ыбзэ нахь благъэ зэфишIыгъэх.
— ТилъэпкъкIэ адыгэ къа- ­шъом мэхьанэшхо иI, ар тикультурэ игушъхьэлэжь баиныгъэ изы IахьышIу, адыгэм ыгу къигущыIыкIырэр шэн-хабз. Тыркуем ис адыгэхэр фестивалым къекIолIагъэх, фабэу къыт­пэгъокIыгъэх. ТыдэкIэ щыIэ адыгэхэр къашъом гукIи псэкIи зэфещэх, — къыIуагъ купым ипащэ.
Лъэпкъ зэфэшъхьафхэм якультурэ фестивалым щэшIэты. Гум къинэжьырэ Iофтхьабзэу ар хъущт. ЦIыф лъэпкъэу зыщыщхэм, динэу алэжьырэм, политикэ еплъыкIэу яIэм, культурэ хэушъхьафыкIыгъэу къагъэгъунэрэм ямылъытыгъэу дунаим ичIыпIэ зэфэшъхьафхэм къарыкIыгъэ лIыкIохэр зэгурыIоныгъэр зыщагъэпытэщт Iофтхьабзэу фестивалыр хъунэу ащ изэхэщакIохэр щэгугъых.
Лъэпшъыкъо Фатим.
Сурэтхэр: ТхьакIущынэ Налбек.