Урысыем ишъолъыр 65-мэ яныбжьыкIэ мини 7 фэдиз АКъУ-м чIахьэ ашIоигъоу къекIолIагъэх. Апшъэрэ еджапIэм бюджет лъап­сэ зиIэ чIэхьагъу лъэхъаныр щызэфашIыжьыгъ.

ПстэумкIи нэбгырэ 6752-мэ ятхылъхэр ащ ратыгъэх. БлэкIыгъэ илъэсым егъэпшагъэмэ, ар процент 32-кIэ нахьыб. Бакалавриатым чIахьэ зышIоигъохэм япчъагъэ процент 15-кIэ хэхъуагъ.
Апшъэрэ еджапIэм ипресс-къулыкъу къызэритырэмкIэ, мыщ чIахьэ зышIоигъохэм янахьыбэр Пшызэ шъолъырым щыщых — нэбгырэ 3239-рэ, ятIонэрэ чIыпIэр Адыгеим ыIыгъ — нэбгырэ 2770-рэ. Джащ фэдэу Къыблэ ыкIи Темыр федеральнэ шъолъырхэм, Камчатскэ ыкIи Приморскэ хэкухэм, Ханты-Мансиийскэ лъэпкъ округым къарыкIыгъэх.
Сэнэхьат пстэумкIи зэнэкъокъур иныгъэ. Апэрэ чIыпIэм юриспруденциер щыт. Зы чIыпIэм нэбгырэ 37-рэ кIэдэугъ. Ащ ыуж къекIы рекламэр ыкIи общественностым изэпхыныгъэхэмкIэ сэнэхьатыр — нэбгырэ 15 зы чIыпIэм, хьисапыр — нэбгырэ 13, зекIонымкIэ ыкIи психолог-кIэлэегъэджэ сэнэхьатым — зы бюджет чIыпIэм нэбгыри 8 итыгъ.
ЧIэхьагъэхэмэ, чIэмыхьагъэхэмэ ныбжьыкIэхэм мы мафэхэм зэрагъэшIэн алъэкIы. Зэфэхьысыжьхэр шъхьэихыгъэ къашIыгъэх. Апшъэрэ еджапIэм ихъытыу нэкIубгъо ахэр къыригъэхьагъэх. ЫпкIэ хэлъэу еджэн мурад зышIыгъэхэм ятхьапэхэм ятын джыри макIо.
Анцокъо Ирин.