СпортымкIэ заслуженнэ мастерэу, чемпионэу, щэрыонымкIэ Паралимпийскэ джэгунхэм тыжьын ыкIи джэрз медальхэр къащызыхьыгъэ Мыекъуапэ щыщ Валерий Пономаренкэм Урысыем ичемпионат хагъэунэфыкIырэ чIыпIэ къыщихьыгъ.

Сэкъатныгъэ зиIэ спортсменхэм язэнэкъокъу Республикэу Удмуртием икъэлэ шъхьаIэу Ижевскэ бэдзэогъум и 27-м щегъэжьагъэу шышъхьэIум и 4-м нэс щэкIо. Олимпийскэ резервым испорт еджапIэу В. Лукиным ыцIэ зыхьырэм къэралыгъом ишъолъыр 20-м къарыкIыгъэ спортсменхэм зыщаушэты. Ахэм ащыщых щэрыонымкIэ гъэхъэгъэшхо зышIыгъэ тиспортсмен цIэрыIохэр: Паралимпийскэ джэгунхэм тыжьын ыкIи джэрз медальхэр къащызыхьыгъэ Сергей Малышевыр, дунаим и Кубок икъыдэхын текIоныгъэр ыкIи хагъэунэфыкIырэ чIыпIэхэр къащызыхьыгъэхэ Марина Абдуллинар, Оксана Березовскаяр, Влада Беспаловар, Татьяна Рябченкэр.

Валерий Пономаренкэм лъэныкъоу «пневматическэ кIэрахъу – метри 10» зыфиIорэм хагъэунэфыкIырэ чIыпIэ къызэрэщыдихыгъэр гъэхъэгъэшIоу плъытэ хъущт. Спортсменыр зыгъасэрэр Урысыем изаслуженнэ тренерэу Георгий Гуляйченкэр ары.
НэбгыритIуми тафэгушIо, тапэкIи мыщ фэдэ гъэхъагъэхэр ашIынхэу, республикэм ыцIэ дахэкIэ рарагъэIонэу афэтэIо.