Адыгэ Республикэм и ЛIышъхьэу КъумпIыл Мурат адыгэ къуаем ифестивалэу илъэс къэс кIорэм изэхэщэнрэ ирегъэкIокIынрэ яIо­фыгъохэмкIэ зэIукIэу щыIагъэр зэрищагъ. Ащ хэлэжьагъэх министерствэхэмрэ къулыкъу зэфэшъхьафхэмрэ яIэшъхьэ­тетхэр, муниципалитетхэм япащэхэр.

Псэлъэ шъхьаIэр къэзышIыгъэр ­Адыгэ Республикэм мэкъу-мэщымкIэ иминист­рэу Къуанэ Анзаур. Фестивалыр зыщыкIощт чIыпIэмрэ уахътэмрэ афэгъэхьыгъэу игъоу алъэгъухэрэм ащ щигъэгъозагъэх.
Адыгэ къуаем ия ХIII-рэ фестиваль ипрограммэ мэфитIум телъытагъэу щыт, ыпэкIэ зыщызэхащэщтыгъэ чIыпIэм —Дахъо гъэхъунэм Iоныгъом и 7-м ыкIи и 8-м ар щыкIощт. ДжэгокIо гъэхъунэм зекIонымкIэ чIыпIакIэ щыгъэпсыгъэным епхыгъэ IофшIэнхэри лъагъэкIуатэх. А чIыпIэм адыгэ къуаем ифес­тивалэу нэужым щыIэщтыр ыкIи мэхьанэшхо зиIэ хъугъэ-шIагъэ­хэм япхыгъэ нэмыкI Iофтхьа­бзэхэри щызэхащэхэзэ ашIыщт.
Республикэм и ЛIышъхьэ фестивалым ипрограммэ къыдилъытэрэ лъэныкъохэм анаIэ тыраригъэдзагъ. ЛIакъохэу къое­ихынымкIэ зищытхъу чыжьэу Iугъэхэм ащыщ унагъохэр агъэ­шIощтых, унагъом и Илъэс те­лъытагъэу нэмыкI Iофтхьабзэхэри зэхащэщтых. Ахэм анэмыкIэу кIэлэцIыкIухэр зыщыджэгущтхэ, зыщычэфыщтхэ чIыпIэм епхыгъэ IофшIэнхэри зэшIуахыщтых, лъэпкъ IэпэщысэхэмкIэ ыкIи творчествэмкIэ мастер-классхэр зэхащэщтых. Республикэм имуниципальнэ образование пэпчъ зэхищэгъэ щагу зэтегъэпсыхьагъэхэр, адыгэ къуаер изыхы­хэ­рэм Iоф зыщашIэщт чIыпIэхэр хьакIэхэм рагъэлъэгъунхэ алъэ­кIыщт. Къуаер зэрэрахырэм нэ­мыкIэу, ар зыщагъэфедэрэ шхыныгъохэри агъэхьазырыщтых, цIыфэу Iофтхьабзэм къе­кIолIа­гъэхэри ахэм ахагъэIэщтых.
Концертым республикэм ипэрыт купхэр хэлэжьэщтых. МэфитIум хъугъэ-шIагъэхэу ре­кIокIыщтхэм онлайн шIыкIэм тетэу яплъынхэ алъэкIыщт.
«Адыгэ къуаем ифестиваль мэхьэнэ ин иI. Республикэм зекIонымкIэ амалэу иIэхэм нэ­Iуасэ зэрафашIыщтхэм дакIоу адыгэ культурэм хьакIэхэр щагъэгъозэщтых, республикэм итамыгъэу хъугъэ къуаер нахь зэлъарагъэшIэщт. Тихэгъэгу ис цIыфхэр адыгэ къуаем нахьыбэу къыкIэупчIэхэ хъугъэ ыкIи тэри къуаеу къыдэдгъэкIырэм илъэс къэс нахь хэтэгъахъо. Фестива­лыр тапэкIэ нахь игъэкIотыгъэу зэрэтшIыщтым дакIоу гъомылэпхъэ къабзэм къыкIэупчIэрэ цIыфхэми яшIоигъоныгъэ зэра­фэдгъэцэкIэщтым тынаIэ тедгъэ­тыщт», — къыIуагъ Адыгеим и ЛIышъхьэ.
Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ Тхьаркъохъо Сафыет.