ШIукIэагу илъыщт
Бэдзэогъум и 25-м, илъэс 95-м итэу идунай ыхъожьыгъ техническэ шIэныгъэхэмкIэ кандидатэу, СССР-м инефтяник гъэшIуагъэу, Адыгэ Республикэм лъэпкъ гъэсэныгъэмкIэ изаслуженнэ IофышIэу, Чэчэн-Ингуш АССР-м наукэмкIэ ыкIи техникэмкIэ изаслуженнэ IофышIэшхоу, орденэу «Щытхъум итамыгъ» зыфиIорэр, медальхэу «IофшIэным иветеран», «IофшIэным гъэхъэгъэшIоу щишIыгъэхэм апай» зыфиIохэрэр къызыфагъэшъошэгъэ Бэгъ Мурат Сыхьатчэрые ыкъом. Ащ щыIэныгъэм чIыпIэ дахэ щызыубытыгъэ къорэ пхъурэ ыпIугъэх. Ыкъоу Бэгъ Саид — зэлъашIэрэ актер, режиссер, Урысыем изаслуженнэ артист, Адыгэ Республикэм инароднэ артист.
АКъУ-м ипресс-къулыкъу къызэритыгъэмкIэ, Мурат Сыхьатчэрые ыкъор Мыекъопэ къэралы-
гъо гуманитар-техническэ колледжым (нэужым Адыгэ къэралыгъо университетым хагъэхьажьыгъэм) илъэс 18-м ехъурэ Iоф щишIагъ. Курсовойхэмрэ дипломхэмрэ япхыгъэ отделыр ары пэщэныгъэ ащ зыдызэрихьэщтыгъэр. ГеологиемкIэ, чIыдэгъэ ыкIи газ промышленностымкIэ Министерствэм ушэтынхэм ялабораторнэ IофшIагъэхэмкIэ и Ведомствэ научнэ совет ар хэтыгъ. ЧIыдагъэм ылъэныкъокIэ лажьэщтыгъэ шIэныгъэлэжьхэми, хэшIыкIышхо а Iофым фызиIэхэми шъхьэкIэфэ ин, осэшхо Мурат фашIыщтыгъ. Грознэм дэт нефть институтым щызэхэщэгъэ советэу шIэныгъэхэмкIэ кандидатыцIэр зыфаусыщтхэр зыщырахъухьэщтыгъэми ар хэтыгъ. Институтым ишIэныгъэлэжьхэм я Совет чанэу Iоф щишIагъ, чIыдагъэр къычIэщыгъэнымкIэ, чIыдэгъэ ыкIи газ къычIэщыпIэхэр гъэунэфыгъэнхэмкIэ секцием итхьаматэу Мурат щытыгъ.
Чэчэн-Ингуш АССР-м и Грозненскэ нефть институт инаучнэ ушэтын IофшIэн ыкIи иобщественнэ политикэ щыIакIэ гъэхъагъэу ащишIыгъэм фэшI орденэу «Щытхъум итамыгъ», медальхэу «За трудовую доблесть», «За доблестный труд» зыфиIохэрэр къыфагъэшъошагъэх. В. И. Лениныр къызыхъугъэр илъэси 100 зэхъум Щытхъу тхылъ, Апшъэрэ Советым и Президиум ищытхъу тхылъитIу ыкIи нэмыкIхэр къыфагъэшъошагъэх. «Чэчэн-Ингуш АССР-м наукэмрэ техникэмрэкIэ изаслуженнэ IофышIэшху» зыфиIорэ щытхъуцIэр къыфаусыгъ.
— Бэгъ Мурат Iоф дэзышIэгъэ, гущыIэгъу фэхъугъэ пстэуми къыхагъэщы Iэдэб зыхэлъ
цIыф Iушэу, шIу зыгу илъ ыкIи IэпэIэсэныгъэшхо зыхэлъ IофышIэу зэрэщытыгъэр. Адыгэ къэралыгъо университетым щылажьэхэрэр зидунай зыхъожьыгъэм иIахьылхэмрэ игупсэхэмрэ афэтхьаусыхэх. Адыгэ лъэпкъым ыкъо шIагъоу Бэгъ Мурат Сыхьатчэрые ыкъор егъэшIэрэу тыгу илъыщт, — къыщеIо АКъУ-м ипресс-къулыкъу къытыгъэ тхьаусыхэ тхылъым.