Бжыхьэ-кIымэфэ уахътэу унэхэр зыщагъэфэбэнхэ фаем псэупIэ-коммунальнэ хъызмэтым епхыгъэ псэуалъэхэр къызэтемыуцонхэм фэшI илъэс къэс гъэмафэм ахэр агъэхьазырых. Мары мы уахътэм Адыгеим имуниципальнэ образованиехэр ащ ыуж итых.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ иотдел ипащэу Хъымыщ Тимур къызэрэтиIуагъэмкIэ, шапхъэхэм къызэращыдэлъытагъэу, кIымафэр икIи, фабэр къатын имыщыкIэгъэжь зэхъум, муниципальнэ образование пэпчъ ипсэупIэ-коммунальнэ хъызмэт епхыгъэ псэуалъэхэм язытет зэрагъэшIагъ, ащ къыгъэлъэгъуагъэ­хэм къапкъырыкIхэзэ гъэцэкIэжьын Iоф­шIэнэу зэшIуахын фаехэм яплан къызэхигъэуцуагъ, нэужым республикэм зэрэщытэу щашIэщтыр агъэнэфагъ.
— ЗэкIэмкIи котельнэ 258-рэ, фабэр къэзытырэ пунктэу 25-рэ, ащ икIуапIэу километрэ 288-рэ, гъэстыныпхъэ шхъуан­тIэм икIуапIэу километрэ мини 3-м ехъу, псы къычIэщыпIэу 276-рэ, ащ икIуапIэу километрэ 2300-м ехъу, фэтэрыбэу зэхэт унэ 1958-рэ къихьащт бжыхьэ-кIымэфэ уахътэм фэдгъэхьазырынэу планым щыгъэ­нэфэгъагъ. Джащ фэдэу пхъэ е шIомыкI зищыкIагъэхэм икъу фэдизэу аIэкIэдгъэхьан фае. ЗэкIэмкIи ахэм сомэ миллиони 105-рэ фэдиз апэIухьащт, — къыIуагъ Хъымыщ Тимур.
Мы уахътэм IофшIэнхэм япроцент 78-р зэшIохыгъэ хъугъэ. Котельни 190-р хьазыр, фабэм икIуапIэхэми процент 78-рэ ахагъэкIыгъ, псы къычIэщыпIэхэм япроцент 81-рэ, ащ икIуапIэхэм япроцент 86-р агъэхьазырыгъах.
Чъэпыогъу мазэм и 1-м нэс муниципальнэ образованиехэм IофшIэнхэр ащаухынхэшъ, Ростехнадзорым ыуплъэ­кIунхэ фае. Ащ зыпари щыкIагъэ къахимыгъэщымэ, унэхэм ягъэфэбэн зэ­рэфэхьазырхэр къэзыушыхьатырэ тхылъхэр къаритыщтых. Непэ пIалъэхэм адиштэу IофшIэнхэр лъэкIуатэх, игъом аухыным зэкIэ ыуж ит.
Ащ нэмыкIэу, псэупIэ-коммунальнэ хъызмэтыр бжыхьэ-кIымэфэ уахътэхэм афэгъэхьазырыгъэнхэм къыдыхэлъытагъэу Кощхьэблэ районымкIэ Блащэпсынэ псэупIэ коим иадминистрацие зычIэт унэм ышъхьэ зэблахъугъ. Квадратнэ метрэ 400 фэдиз хъурэм сомэ миллиони 2-м ехъу пэIухьагъ.
ПсэупIэ-коммунальнэ хъызмэтым игъэкIэжьын фытегъэпсыхьэгъэ шъолъыр программэу 2023 — 2027-рэ илъэсхэм ателъытагъэм ипхырыщыни лъагъэкIуатэ. Хъымыщ Тимур тызэрэщигъэгъозагъэмкIэ, ащ къыдыхэлъытагъэу Адыгэкъалэ фабэм икIуапIэхэр щызэблахъух. Мы уахътэм зыуж итхэр километри 7-м ехъум изэблэхъун сомэ миллион 276-рэ пэIухьащт. IофшIэнхэр блэкIыгъэ илъэсым ыгузэгухэм адэжь рагъэжьагъэх, мыгъэ унэхэм ягъэфэбэн къэмысызэ аухынэу ары гухэлъэу яIэр.
— Адыгэкъалэ мы лъэныкъомкIэ гумэкIыгъохэр зиIэхэр бэшIагъэ, — къыIуагъ ащ. — ЧIычIэгъымкIэ къалэм псэу къыкIахьэрэр лъэшэу къыдэ­кIуаешъ, трубэхэр ащ хэлъхэ мэхъух. Ащ ыпкъ къикIэу мэулъыих, зэхэтакъох, псыр къатIупщы. КIуапIэхэр за­гъэпсыгъэхэм къыщыублагъэу зыпарэкIи зэблахъугъэхэп. Джы мы программэм ишIуагъэкIэ «пенополиуретан» зыфаIорэм хэшIыкIыгъэу, псэу къыкIа­хьэрэм иягъэ римыгъэкIынэу, лъэхъаным диштэрэ сеть дэгъу яIэ хъущт.
Мы программэм ишIуагъэкIэ блэкIыгъэ илъэсым Мыекъуапэ псы къабзэм икIуапIэу километри 7,7-рэ щызэбла­хъугъ, пстэумкIи сомэ миллиони 117-рэ тефагъ. 2024-рэ илъэсым джыри кIопIэ километрэ 27-рэ агъэкIэжьынэу ащ ипроект агъэхьазырыгъ. Ащ сомэ миллион 400 фэдиз пэIухьащт. Ахэм анэмыкIэу псы шIоим пае километри 3 Адыгеим икъэлэ шъхьаIэ щызэблахъунэу тхылъхэр агъэхьазырыгъэх. Ащ сомэ миллион 60 тефэщт.

Джащ фэдэу энергием икъызэтегъэнэн фытегъэпсыхьэгъэ программэм къыды­хэлъытагъэу, станицэу Джаджэм котельнэ щагъэцэкIэжьы. Мыгъэ джыри ащ фэдэу зы псэуалъэ мыщ щашIын гухэлъ яI. Сомэ миллиони 6 тефэщт, илъэсым ыкIэм нэс аухынэу ары зэрагъэнэфагъэр.
Iофыгъоу непэ къэуцухэрэми ягугъу тшIыгъэ. Электроэнергием, гъэстыныпхъэ шхъуантIэм апкIэ игъом къэзымытыхэрэр организациехэм зэрахэтхэр ары анахьэу тызтегущыIагъэр. ПсэупIэ-коммунальнэ хъызмэтым ипсэуалъэхэр бжыхьэ-кIымэфэ уахътэхэм зыщафагъэхьазырхэрэ лъэхъаным чIыфэхэр «гъэохъуакIо» мэ­хъух.
Хъымыщ Тимур къызэриIуагъэмкIэ, мы илъэ­сым ижъоныгъокIэ мазэ нэс пштэмэ, гъэстыныпхъэ шхъуантIэмкIэ чIыфэхэр сомэ миллион 479-м ехъух, электроэнергием ыпкIэу къамытыгъэр сомэ миллиони 145,4-рэ мэхъу. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ и Министерствэ иунашъо­кIэ межведомственнэ комиссие зэхащагъ. Гъэстыныпхъэ шхъуан­тIэм электроэнергием, псым, фабэм апкIэ игъом къэугъоигъэ хъуныр ары ар зыфэгъэзагъэр. Ащ хэбзэухъумэкIо къулыкъухэм, ПсэупIэ инспекцием, уасэхэмрэ тарифхэмрэкIэ АР-м и ГъэIорышIапIэ, экономикэ хэ­хъоныгъэмкIэ ыкIи сатыумкIэ Министерствэм ялIыкIохэр хагъэхьагъэх.
— ХъызмэтшIапIэхэр бжы­хьэ-кIымэфэ уахътэм фэгъэхьазырыгъэнхэмкIэ чIыфэхэм яягъэ къэкIо. Ахъщэр икъоу аIэкIэлъмэ, IофшIэнэу ищыкIагъэр хэзыгъэ имыIэу арашIылIэщт. ХъызмэтшIэпIэ цIыкIухэр ары анахьыбэу гумэкIыгъо хафэхэрэр. Сыда пIомэ ахэм амалэу яIэр нахь макI, предприятие инхэм къыз­ха­гъэкIын IэпэчIэгъанэ аIэкIэлъ, — къыIуагъ Хъымыщ Тимур.
ПсэупIэ-коммунальнэ хъызмэтым епхыгъэ IофшIэнэу республикэм щызэшIуахырэр зэкIэ фабэр, псы къабзэр, гъэстыныпхъэ шхъуан­тIэр, электроэнергиер унэхэм икъоу аIэкIэхьанхэм, цIыфхэм Iэрыфэгъу щыIакIэ яIэным фыте­гъэпсыхьагъэх. Ахэр мыгужъонхэм пае гъэстыныпхъэ шхъуантIэм, псым, электроэнергием, фабэм, нэмыкI псэупIэ- коммунальнэ фэIо-фа­шIэхэм апкIэ игъом ттыныр зэкIэми типшъэ­рылъ.
ХЪУТ Нэфсэт.
Сурэтхэр: Iэшъынэ Аслъан.