Адыгеим къэзыгъэзэжьыгъэ тилъэпкъэ­гъухэм ямэфэкI ипэгъокIэу зэкIэлъыкIоу спорт зэнэкъокъухэр зэхащэгъагъэх. Сирием, Тыркуем, Югославием ыкIи Иорданием къарыкIыжьыгъэ тилъэпкъэгъухэм якомандэхэм футболымкIэ IэпэIэсэныгъэу яIэр къагъэлъэгъуагъ.

ХэбзэшIу зэрафэхъугъэу, Iофтхьабзэм кIэщакIо фэхъугъэх къэзыгъэзэжьыхэрэр щыIэныгъэм хэгъэгъозэжьыгъэнхэмкIэ Гупчэр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет, АР-м физкультурэмкIэ ыкIи спортымкIэ и Комитет.
МэфэкI ешIэгъухэр къызэIуихыгъ къэзыгъэзэжьыгъэхэр щыIэныгъэм хэгъэгъозэжьыгъэнхэмкIэ Гупчэм ипащэу ГъукIэлI Асхьад. Ащ шIуфэс гущыIэхэмкIэ къызэхэхьагъэхэм зафигъэзагъ: «Мыгъэ илъэс 26-рэ хъугъэ хэку къэгъэзэжьыныр зызэшIотхырэр, АдыгеимкIэ ащ мэхьанэшхо иI. Лъытэныгъэ азыфагу илъэу Адыгеим зэрэщызэдэпсэущтхэм, гъэхъагъэ­хэр ашIыхэзэ мамырэу зэрэлэжьэщтхэм тыпылъ. Зэнэкъо­къоу непэ зэхэтщагъэм щытекIорэм емылъытыгъэу, зэкъошныгъэ-блэ­гъэныгъэр ыгъэпытэнэу ты­щэгугъы».
Иорданием къикIыжьыгъэ командэм хэт Энэс Батыр къызэриIотагъэмкIэ, илъэс пчъагъэ хъугъэу футбол командэ зэхащагъэу мэджэгух. Сэнэхьат зэфэшъхьафэу яIэм емылъытыгъэу, футболым зэрипхыгъэх. Мыгъэ нахь дэгъоу ащ зыфагъэхьазырыгъ, текIоныгъэм щыгугъыхэу зэнэкъо­къум къекIолIагъэх.
Косовэ къикIыжьыгъэхэм якомандэ хэтэу Хьасани Мухьамэд мыщ фэдэ зэхахьэм зэкъошныгъэм зэрэфищэхэрэм игугъу къышIыгъ. Нахьыжъхэм арагъэлъэ­гъурэ гъогум ныбжьыкIэхэр зэрэрыкIощтхэм ицыхьэ зэрэтелъыр къыIуагъ.
Зэнэкъокъум командитф хэлэжьагъ. Спорт IэпэIэсэныгъэу ахэлъыр купмэ къагъэлъэгъуагъ. IэкIыбым къикIыжьыгъэ тилъэпкъэгъухэу «Сирия-2» зыфиIорэ командэм а 1-рэ чIыпIэр, «Мэфэхьаблэм — я 2-р, «Сирия-1-м я 3-р, «Иорданием» я 4-рэ чIыпIэр, «Тыркуем» я 5-рэ чIыпIэр аубытыгъ. Командэхэм шIухьафтынхэр аратыгъэх. Зэкъошныгъэ- фэбэныгъэ зэфыряIэу Iофтхьабзэр аухыгъ.
Лъэпшъыкъо Фатим.
Сурэтыр авторым ий.