МазэкIэ еджэгъу илъэсыкIэр рагъэжьэжьыщт. Джырэ уахътэм еджапIэхэм ащ зыфагъэхьазыры, игъэкIотыгъэ гъэцэкIэжьынхэр ащыщхэм ащашIых. Республикэм икъэлэ шъхьаIэкIэ ахэр плIы мэхъух.

Шъолъыр еджапIэхэм игъэкIотыгъэ гъэцэкIэжьынхэр ащышIыгъэнхэм игукъэкI партиеу «Единэ Россием» къыпкъырыкIи, Президентэу Владимир Путиным дыригъэштагъ. Къэралыгъом ипащэ ипшъэрылъкIэ Урысыем и Правительствэ илъэситфым телъытэгъэ программэ ыштагъ – къэралыгъо программэу «Гъэсэныгъэм ихэхъоныгъ» зыфиIорэм къыдыхэлъытагъэу «Гъэсэныгъэм иеджэпIэ сис­темэ гъэкIэжьыгъэныр» зыцIэр.
Мы илъэсым МыекъуапэкIэ игъэкIотыгъэ гъэцэкIэжьынхэр ащэкIох япсауныгъэкIэ лъэкI макIэ зиIэ сабыйхэр зычIэсхэм, я 35-рэ лицеим, я 10-рэ ыкIи я 15-рэ еджапIэхэм.
Республикэм икъэлэ шъхьаIэ гъэсэныгъэм­кIэ и Комитет ипащэу Олег Черниковым къызэриIуагъэмкIэ, гъэцэкIэжьынхэр федеральнэ, Адыгеим ыкIи къалэм ябюджет мылъкукIэ зэшIуахых.

— Муниципальнэ бюджетымкIэ гъэсэныгъэм иучреждениехэм ящагухэр зэтырагъэп­сыхьащтых, ахэр къызэрэшIыхьагъэхэр зэблахъущтых. АР-м и Правительствэ ыкIи шъолъырым ипащэу КъумпIыл Мурат яшIуа­гъэкIэ агъэцэкIэжьыгъэ еджапIэхэм оборудованиякIэрэ псэолъакIэхэмрэ къачIэуцощтых, — къыIотагъ Олег Черниковым. – Непэрэ мафэм гъэцэкIэжьынхэр зышIыхэрэр кIэух IофшIэнхэм къафэкIох. ЧIыпIэхэм псэолъэшIын уплъэкIунхэр ащэкIох. Ны-тыхэм якомитетхэм ялIыкIохэр джащ фэдэу лъэплъэх гъэкIэжьынхэр зэрэкIохэрэм.
Я 35-рэ лицеим ипащэу Анастасия Эйхвальд къызэриIуагъэмкIэ, еджапIэу агъэцэкIэжьыхэрэм ядизайн-проектхэр ашIыхэ зэхъум кIэлэеджакIохэм янэ-ятэхэр ащ чанэу къыхэлэжьагъэх.
— ТиеджакIохэм янэ-ятэхэм яшIошIхэр тшIэн фае. Классхэм ядизайн къызэдыхэтхыгъ, ахэр зэрэзэгъэфэгъэщтхэм, шъо зэмлIэужыгъоу агъэфедэщтхэм тахэдагъ. Ны-ты комитетхэм джырэ уахътэм зэхащагъ «ны-ты уплъэкIункIэ» зэджагъэхэр. Ахэр ежьхэм ашъхьэкIэ псэолъэшIынхэр зэрэкIохэрэм лъэплъэх, ашIогъэшIэгъон хъурэм къыкIэупчIэх, — къыIотагъ лицеим ипащэ.
Непэрэ мафэм ехъулIэу зэпкъырыхын IофшIэнхэр аухыгъэхэу дэпкъхэмрэ кIашъохэмрэ агъэкIэжьых. Унашъхьэхэр, инженернэ хъытыухэр зэблахъух. Шы­шъхьэIум иублэгъум кабинетыкIэхэм псэуалъэхэмрэ оборудованиякIэмрэ къачIащэщтых.

IофшIэнхэр зэрэкIохэрэм мы мафэхэм зыщагъэгъозагъ Урысые политическэ партиеу «Единэ Россием» ичIыпIэ къутамэ илIыкIохэм, АР-м и Къэралыгъо Совет – Хасэм ыкIи Мыекъуапэ инароднэ депутатхэм я Совет яхэбзэгъэ­уцухэм, Мыекъуапэ гъэсэныгъэмкIэ и Комитет ялIыкIохэм, мыхэм ягъусагъэх ны-тыхэри.
Мыекъуапэ инароднэ депутатхэм я Совет и Тхьаматэу Джарымэкъо Азмэт къызэриIуагъэмкIэ, псэолъэшIын IофшIэнхэр зэрэзэшIуахыхэрэм ипсынкIагъэкIэ игъэкIотыгъэ гъэцэкIэжьынхэр пIалъэу агъэнэфагъэм къаухынхэу щытых.

— Хэбзэгъэуцухэмрэ ны-тыхэмрэ зэгъусэхэу апэрэ илъэсэп муниципальнэ псэупIэм иеджапIэхэм гъэцэкIэжьынхэр зэращашIыхэрэр зауплъэкIурэр. Мыгъэ къыхиубытэрэ объектхэр къэткIухьэхэ зэхъум, мы еджапIэхэм Iоф ащызышIэхэрэми, зисабый кIохэрэми яшIошIхэр зэхэтхынхэм мэхьанэшхо иIагъ. ЗэкIэ IофшIэнхэр заухыхэкIэ, гъэсэныгъэм иучреждениехэр экологием, технологическэ шапхъэхэм адиштэхэу ыкIи щынэгъончъэхэу щытынхэ фае, — къыкIигъэтхъыгъ Джарымэкъо Азмэт.
Александра Балабась.