ПIалъэхэм адиштэу
ЦIыфхэм зызщагъэпсэфыщт ыкIи яуахътэ зыщагъэкIощт чIыпIэ зэтегъэпсыхьагъэхэр шIыгъэнхэр ары «Iэрыфэгъу къэлэ щыIакIэ гъэпсыгъэныр» зыфиIорэ федеральнэ проектым пшъэрылъ шъхьаIэу иIэр. УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае ар аштагъ.
Адыгеим проектыр илъэс пчъагъэ хъугъэу щыпхыращы. Мыщ дэжьым къыщыхэгъэщыгъэн фаер ащ къыдыхэлъытагъэхэм ягъэцэкIэнкIэ республикэр шъолъыр анахь чанхэм зэращыщыр ары. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, 2019-рэ илъэсэу республикэм ар зыщырахьыжьагъэм къыщыублагъэу 2023-м ыкIэм нэс пштэмэ, фэтэрыбэу зэхэт унэхэм ящагу 216-рэ агъэкIэжьыгъ, общественнэ чIыпIи 106-рэ зэтырагъэпсыхьагъ е кIэу ашIыгъ. ПстэумкIи сомэ миллиарди 2,5-м ехъу ахэм апэIухьагъ.
БлэкIыгъэ 2023-м изакъоу пштэмэ, мы лъэпкъ проектым къыдыхэлъытагъэу общественнэ чIыпIэ 11 ыкIи фэтэрыбэу зэхэт унэхэм ящагухэу 31-рэ агъэкIэжьыгъ. Ащ зэкIэмкIи сомэ миллион 359,3-рэ тефагъ.
Джы мы къихьэгъэ 2024-м общественнэ чIыпIи 8 ыкIи щагу 32-рэ республикэм щагъэкIэжьынэу агъэнэфэгъагъ. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, Мыекъуапэ къыщыхахыгъэгъэ щагу 21-р зэтырагъэпсыхьажьыгъах. Ахэм ялъэсрыкIо ыкIи автомобиль гъогухэр агъэцэкIэжьыгъэх, тIысыпIэхэр, хэкIитэкъупIэхэр кIэу ащагъэуцугъэх, чъыгэу адэтхэм апыупкIыхьагъэх, гъэпсэфыпIэ чIыпIэхэр, автотранспорт уцупIэхэр агъэпсыгъэх, кIэлэцIыкIу джэгупIэхэр ащагъэцэкIэжьыгъэх, щагухэр чэщырэ къэнэфынхэу ашIыгъ. Къэлэ администрацием къызэритыгъэмкIэ, сомэ миллиони 94,4-рэ IофшIэнхэм апэIухьагъ, пIалъэхэм адиштэу зэкIэри ашIыгъ.
ХЪУТ Нэфсэт.