«Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэ лъэпкъ проектым къыдыхэлъытагъэу мыгъэ республикэм щагъэцэкIэжьынэу агъэ­нэфагъэхэм Кощхьэблэ районым игъогу Iахьэу нахь кIасэу ахагъэхъожьыгъэм игъэцэкIэжьын фежьагъэх. ШышъхьэIу мазэм ыкIэм нэс аухынэу ары гъогушIхэм гухэлъэу яIэр.

Километрих фэдиз хъурэ Iахьыр Мыекъуапэ икIэу къалэу Карачаевскэ кIорэ гъогум щыщ. Ащ ия 79-рэ километрэу Кощ­хьэблэ районым игъунапкъэхэм адэжь щыIэр «Адыгеяавтодорым» аригъэгъэцэкIэжьынэу ыгъэнэфэгъэ чIыпIэхэм яя 18-рэ хъугъэ.
Илъэс планым зызэрэрагъэу­шъомбгъугъэ ахъщэр шъолъыр бюджетым къыхэкIыгъ. Электроннэ шIыкIэм тетэу зэнэкъо­къур зэхащагъ, Кощхьэблэ районым игъогушI хъызмэтшIапIэ зэзэгъыныгъэм дыкIэтха­гъэх. ПстэумкIи сомэ миллиони 150-рэ IофшIэнхэм атефэщт.
«Адыгеяавтодорым» къызэрэщаIуагъэмкIэ, гъогум изытет ауплъэкIуи, цIыфхэм ялъэIу къыдалъытэзэ, а Iахьыр агъэ­кIэжьыщтхэм ахагъэхьагъ.
Непэ шъолъыр гъогоу респуб­ликэм иIэм ипроцент 63,5-р шапхъэхэм адештэ, мыр загъэ­цэкIэжькIэ, а пчъагъэм джыри хэхъощт. Арэу щытми, пчъагъэ­хэр арэп анахь шъхьаIэр. Къо­джэ гъогухэм язытет нахьышIу шIыгъэныр лъэпкъ проектым пшъэрылъ шъхьаIэу иIэхэм ащыщ.
Мыекъуапэ икIэу Карачаевскэ кIорэ гъогум станицэу Джаджэр, поселкэу Псыбэ ыкIи станицэу Зеленчукскэр зэпечых. Арышъ, ар мэкъумэщ хъызмэт­шIапIэ зиIэхэми, республикэм ирайонищмэ арысхэми, гъунэгъу шъолъырым щыпсэухэрэми зэдагъэфедэ. Анахь къутэгъэ чIыпIэхэр игъом гъэцэкIэжьыгъэнхэр пшъэрылъ шъхьаIэу республикэ пащэхэм гъогушIхэм къафагъэуцухэрэм ащыщ.
Гъогу Iахьэу зыфежьагъэхэм асфальтэу телъыр тырахыщт, иутыгъэу иIэхэр агъэсэищтых, нэужым зэщиз ашIынышъ, кIэу тыралъхьажьыщт. Джащ фэдэу гъогу гъунэхэр агъэпытэщтых, тамыгъэхэр тырагъэуцощтых е зыщищыкIагъэм щагъэтхъыщтых.