Зихэкужъ къэзыгъэзэ­жьыгъэм и Мафэ ехъу­лIэу къуаджэу Мэфэхьаблэ икIэлэцIыкIухэм спорт зэнэкъокъухэр ащыфызэхащэгъагъэх.

ХэбзэшIу зэрафэхъугъэу, Iоф­тхьабзэм кIэщакIо фэхъугъэх къэзыгъэзэжьыхэрэр щыIэны­гъэм хэгъэгъозэжьыгъэнхэмкIэ Гупчэу Адыгеим щызэхэщагъэр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет, АР-м физкультурэмкIэ ыкIи спортымкIэ и Комитет.
КIэлэцIыкIухэм язэнэкъокъу къызэIуихыгъ къэзыгъэзэжьыгъэ­хэр щыIэныгъэм хэгъэгъозэ-жьыгъэнхэмкIэ Гупчэм ипащэу Гъу­кIэлI Асхьад. Ащ шIуфэс гущыIэхэмкIэ къызэхэхьагъэхэм зафигъэзагъ: «Хэку къэгъэзэ­жьыныр мыгъэ илъэс 26-рэ хъугъэ зызэшIотхырэр. Непэ кIэлэцIыкIухэм анахьэу тынаIэ атетэгъэты. Хабзэ тфэхъугъэу илъэс къэс спорт зэнэкъокъу­хэр ахэм афызэхэтэщэх. Ащ пшъэ­рылъыбэу иIэхэм ащыщ зэкъош­ныгъэ-блэгъэныгъэр гъэпытэ­гъэныр».
МэфэкIым ипэгъокIэу зихэку къэзыгъэзэжьыгъэхэм якIэлэцIыкIухэм афызэхащэгъэ Iоф­тхьабзэм къуаджэм дэсыр зэкIэ къекIолIагъ. Зэнэкъокъухэм кIэ­лэцIыкIу 30 фэдиз ахэлэ­жьагъ. Чэфым зэрихьэхэу сабыйхэр къызэпэчъагъэх, къулай­ныгъэу ахэлъыр къагъэлъэ­гъуагъ. Ахэм язэфэхьысыжьыр гъэнэфагъэ — зэкъошныгъэм текIоныгъэр къыдихыгъ. Джэгун­хэм ахэлэжьэгъэ кIэлэцIыкIу пэпчъ шIухьафтынхэр араты­гъэх.

МэфэкI Iофтхьбазэм хэлэ­жьагъ къэшъокIо ансамблэу «Мыекъуапэ инэфылъэхэр». Ащ ипрограммэ ягуапэу ини цIыкIуи еплъыгъ, бэрэ Iэгу афытеуа­гъэх.
Мэфэхьаблэ щыпсэурэ Цэй Мейса икIэлэцIыкIоу Алан зэ­нэкъокъухэм ахэлэжьагъ. «Непэрэ зэхахьэм фэдэм кIэлэцIыкIухэр епсыхьэх, зыкIыныгъэ ахелъхьэ, адыгабзэкIэ мэгущы­Iэх, лъэпкъым рэгушхох. «Тхьа­шъуегъэпсэу» ясIомэ сшIоигъу Iофтхьабзэм икIэщакIохэм», — къыIуагъ Мейса.
Мэфэхьаблэ иадминистрацие ипащэу Хьасани Мыхьамэт къызэриIуагъэмкIэ, непэ чылэм унэгъо 83-рэ щэпсэу, зэкIэмкIи нэбгырэ 300 мэхъух, сабыеу ахэтыр нэбгырэ 70-рэ.
Ащ игуапэу хигъэунэфыкIыгъ: «Чылэм мэфэкIэу дэтым егъэгушIох, осэ ин фашIы. ЯщыIакIэ нахьышIу зэрэхъущтым, лъытэныгъэ азыфагу илъэу зэрэщызэдэпсэущтхэм, гъэхъагъэхэр ашIыхэзэ мамы-
рэу зэрэлэжьэщтхэм пылъых. Тихэку тисэу лъэпкъым итарихъ тисабыйхэм ятэгъашIэ. Хэку­жъым фэбэныгъэу къытфыриIэр зэхэтэшIэ».
Лъэпшъыкъо
Фатим.