Бэдзэогъум и 30-м, Хэку­жъым къэзыгъэзэжьыгъэм и Мафэ ипэгъокIэу, «Кавказ хэхэсхэр» (Кавказская диаспора) зыцIэ къэгъэлъэгъон АР-м и Сурэт къэгъэлъэгъуапIэ къыщызэIуахыщт. Живописым, графикэм ыкIи нэ­мыкI художественнэ шъуа­шэхэм арылъ IофшIэгъэ 70-рэ фэдиз ащ хэхьащт.

Мыщ фэдэ къэгъэлъэгъоныр шы­шъхьэIум и 1-м ехъулIэу зэхащэныр республикэмкIэ хабзэ хъугъэ. Шъугу къэдгъэкIыжьын, а мафэм, 1998-рэ илъэсым, Косово къикIыжьхи апэрэ адыгэ хэхэсхэр хэкужъым къихьа­жьыгъэх. Ащ къыщегъэжьажьэу шы­шъхьэIум иапэрэ мафэ зи Хэкужъ къэзыгъэзэжьыгъэхэм я Мафэу рес­публикэм щыхагъэунэфыкIы ыкIи Адыгеим итарихъ ащ чIыпIэ ин щеу­быты.
Адыгэ культурэр къэухъумэгъэным, хахъо егъэшIыгъэным ыкIи зэпхыныгъэхэр гъэпытэгъэнхэм къэгъэлъэгъоныр афэлажьэ. Мафэм сыхьатыр 3-м ар къызэIуахыщт. ШIоигъоныгъэ зиIэхэр зэкIэ ащ рагъэблагъэх.
Анцокъо Ирин.