ШышъхьэIум и 10-м, физкультурникым и Мафэ тефэу, Адыгэ къэралыгъо университетым испортивнэ ордэунэу Кобл Якъубэ ыцIэ зыхьырэм дзюдомкIэ зэнэкъокъухэр щыкIощтых, ахэр Континентальнэ лигэмкIэ апэрэ едзыгъоу 2024-рэ илъэсым рагъэкIокIырэм къады­хэлъытэгъэщтых.

Урысыем ыкIи IэкIыб къэрал­хэм къарыкIыщтхэ хъулъфыгъэ командэхэр ары ащ хэлэжьэщтхэр, ащ пае дунэе зэнэкъокъукIэ ахэр агъэкIощтых.
Урысыем дзюдомкIэ ифеде­рацие ипроект 2023-рэ илъэсым ытIупщыгъ, мыгъэ ащ зэ­лъашIэрэ спортсменхэр хэлажьэх, чIыпIэу къыдахын алъэкIыщтхэми, шIухьафтынэу илъыщтхэми ахагъэхъуагъ. ЕдзыгъуитIумкIэ финалым ихьащтхэр дивизио­ниплIымэ къащылъэгъощтых: «Кав­казыр», «КъокIыпIэр», «Гуп­чэр» ыкIи «Динамэр».
Адыгэ Республикэм дивизионэу «Кавказыр», «Олимпийскэ чемпионэу Мудрэнэ Бислъан» зыфиIохэрэр ригъэкIокIыщтых. Къыблэ Урысыем ыкIи IэкIыб хэгъэгу благъэхэм къарыкIыщт клубнэ команди 8 текIоныгъэм фэбэнэщтых.

Зэнэкъокъухэм афэшъхьафэу спортивнэ хъугъэ-шIагъэм тре­нировкэхэр, бэнакIэхэм якъэгъэ­лъэгъон къыделъытэх. Апэрэ бэ­нэгъухэр пчэдыжьым сыхьатыр 9-м рагъэжьэщтых. Турнирыр мэфэкI шIыкIэм тетэу сыхьатыр 5-м ыныкъом къызэIуахыщт, финалым ихьагъэхэм бэнэгъухэр сыхьатыр 5-м аублэщтых. ЗэIу­кIэхэм яплъынэу фаехэр ыпкIэ хэмылъэу ордэунэм чIэхьанхэ алъэкIыщт.
Апэрэ едзыгъом текIоныгъэ къыщыдэзыхырэмэ атырагощэщт шIухьафтыныр сомэ миллиони 5-рэ мин 600-рэ мэхъу. Дивизион пэпчъ анахь лъэшэу зыкъэзы­гъэлъэгъогъэ командэ тIурытIу Лигэм ифинал ихьащтых. ПэшIорыгъэшъ чэзыухэм ящэнэрэ чIыпIэхэр къащыдэзыхыгъэхэр фи-
нал цIыкIум щызэнэкъокъущтых, ащ шIухьафтынэу сомэ миллион илъыщт.
Шъугу къэдгъэкIыжьын, 2023-рэ илъэсым итыгъэгъэзэ мазэ апэрэ чэзыум изэнэкъокъухэу зэхащэ­гъагъэхэм къалэу Грознэм икомандэу «Ахмат» текIоныгъэр къыщыдихыгъагъ, ятIонэрэ чIыпIэм уцугъэр клубэу «Урал — КъохьэпIэ Сыбырыр» (Екатеринбург), ящэнэрэр — «СОРБИС» (Москва) ыкIи «Локомотив» (Налщык).