Къуаджэу Гъобэкъуае модельнэ тхылъеджапIэ къыщызэIуахыгъ. Ащ фэгъэхьыгъэ мэфэкI Iофтхьабзэ тыгъуасэ щызэхащагъ.

Къат Теуцожь ыцIэ зыхьырэ культурэм и Унэу Гъобэкъуае дэтыр 2022-рэ илъэсым загъэцэкIэжьым, ащ хэт къоджэ тхылъеджапIэри дагъэкIэжьы­гъагъ. Ащ дэжьым ыужкIэ модельнэ зэрашIыщтыр къыдыхалъыти, иинагъэ зырагъэу­шъомбгъугъагъ ыкIи агъэкIэжьын зыхъукIэ ящыкIэгъэщт зэхъокIыныгъэхэр фашIыгъагъэх. Джы лъэпкъ проектэу «Культурэм» иамалкIэ ащ ыкIоцI непэрэ шапхъэхэм адиштэу зэтырагъэ­псыхьагъ. ПстэумкIэ IофшIэнхэм сомэ миллиониим нахьыбэ апэIухьагъ. ТехнологиякIэхэр рахьылIагъэх, компьютернэ, мультимедийнэ псэуалъэхэр, джэгукIэ зэфэшъхьафхэр чIагъэ­уцуагъэх, конференциехэр зыщырекIокIыщт чIыпIэр шъхьа­фэу агъэпсыгъ, тхылъыкIэхэр ащэфыгъэх. ЗэкIэмкIи тхылъ мин 12-р мэкIайхэм атет. Пчъа­гъэм щыщэу мини 3-р — кIэ. Ахэр модельнэ тхылъеджапIэм игъэ­псын къыдыхэлъытагъэу зэрагъэгъотыгъэх.

ТхылъеджэпIакIэр зыфэдэр хьакIэхэми къоджэдэсхэми ауплъэкIугъ. Анахь цIыкIухэми инхэми ашIогъэшIэгъонэу ама­л­ыкIэу яIэ хъугъэхэм защагъэгъозагъ. ИлъэсипшI зыныбжь СтIашъу Айдэмыр цIыкIум ынэхэр инэу зеплъыхьэ, ылъэгъурэр зэкIэ ыгу рехьы:
— ТхылъеджапIэр амыгъэ­кIэжьызэ сыкъакIощтыгъ, ау джы къэпшIэжьынэу щытэп. Лъэшэу сыгу рехьы. Уфаемэ, мары тхылъхэр мэкIаим къытехи едж, уфаемэ, дэпкъым кIэрыхьи шахмат ешI. Джы мафэхэр щыдгъакIохэзэ тшIыщт мыщ.
СтIашъу Аминэт – Гъобэ­къуае щэпсэу:
— ЧылэмкIэ мэхьэнэ ин зиIэ чIыпI тхылъеджапIэр. Сэ сшъхьэ­кIэ седжэнэу сикIасэшъ, бэрэ сыкъэкIо. Джы кIэхэр къаща­гъэх. Ахэм ащыщ седжэфэ сызэгоуты. Мы мэфэкI жъотыр зэрэтекIэу сыкъэкIонышъ, сахэплъы­хьащт. Ар сыгу IэшIу-IэшIоу телъ.

ТхылъеджапIэм икъызэIухын фэгъэхьыгъэ мэфэкIым хэлэжьагъэх АР-м культурэмкIэ иминистрэ игуадзэу Кушъу Светланэ, Теуцожь районым инароднэ депутатхэм я Совет итхьаматэу ПчыхьалIыкъо Аюб, модельнэ тхылъеджапIэр зыхэт культурэм и Унэ зыцIэ ыхьэу, УФ-м инароднэ, Адыгеим изаслуженнэ сурэтышIэу Къат Теуцожь, культурэм иIофышIэхэр, къоджэдэс­хэр.
ПчыхьалIыкъо Аюб — Теуцожь районым инароднэ депутатхэм я Совет итхьамат:
— Непэрэ модельнэ тхылъ­е­джапIэм икъызэIухын къуа­джэмкIи, районымкIи культурнэ хъугъэ-шIэгъэ ин. Лъэпкъ проектэу «Культурэм» ыкIи респуб­ликэм щылэжьэрэ къэралыгъо программэу «Культурэм хэхъо­ныгъэ ышIыныр» зыфиIорэм ар яхьатыр. ЗэкIэ шъолъырхэм мыщ фэдэ зэхъо­кIыныгъэшIухэр ящыкIагъэх. Тэ ти ЛIышъхьэу КъумпIыл Мурат ишIуагъэкIэ а пстэур гъэцэкIагъэ мэхъу. Арышъ, республикэ ЛIышъхьэми, АР-м культурэмкIэ иминистри «тхьашъуегъэпсэу» ясIо сшIо­игъу.

ПчыхьалIыкъо Аюбэ ипэублэ гущыIэ къыкIэлъыкIоу, мэфэкIым къыдыхэлъытагъэу районым икультурэ хахъо ышIынымкIэ яIахьышIоу халъхьагъэм фэшI Теуцожь районым ыкIи народнэ депутатхэм я Совет ацIэкIэ щытхъу тхылъхэр афагъэшъошагъэх АР-м культурэмкIэ иминистрэ игуадзэу Кушъу Светланэ, УФ-м инароднэ, Адыгеим изаслуженнэ сурэтышIэу Къат Теуцожь, АР-м и Лъэпкъ тхылъеджапIэ ипащэ игуадзэу Пэнэшъу Фатимэт.
Кушъу Светлан — АР-м культурэмкIэ иминистрэ игуадз:
— Тхьашъуегъэпсэу, лъэшэу сигуапэ. КъасIомэ сшIоигъор — непэ къызэIутхыгъэ модельнэ тхылъеджапIэр районымкIэ ятIонэр, ау республикэмкIэ я 14-р. Зэдэлэжьэныгъэу зэкIэми тазыфагу илъым ыкIи АР-м и ЛIышъхьэу КъумпIыл Мурат Iофышхоу ышIэрэм а зэкIэ къыкIэкIуагъ. Сыдигъуи шъхьа­Iэхэр сабыйхэр ары. Непэ ахэм тынаIэ атедгъэтын, ячIыгу, яхэгъэгу шIу алъэгъоу тпIунхэ фае. ТхылъеджапIэм ащкIэ мэхьанэшхо иI. ГъэкIэжьыгъэ тхылъеджапIэм сэри сиIахь хаслъхьэ сшIоигъоу ситхылъэу «Шуточные танцы адыгов» зыфиIорэр къэ­схьыгъ. Тхылъ­еджапIэм чIэлъы сшIоигъу, еджа­кIохэм къашъхьапэнэу сэгугъэ.

Къат Теуцожь — УФ-м инароднэ, Адыгеим изаслуженнэ сурэтышI:
— Сянэ псэугъэмэ, мыщ къэ­сщэни къэзгъэтIысыщтыгъэ, ащ ынэкIэ гъобэкъуаехэм ­сяплъы. Непэ сэгушIо, сызыщыщ къуаджэм сыфэгушIо. Тыгъу­жъмэ япхъу Симэу тхылъеджапIэм Iоф щызышIэщтыгъэр дэгъоу къэсэшIэжьы. Арышъ, шъу­шъхьапэ Тхьэм ешI тхылъ­е­джапIэр. Гъо­бэкъуае дахэ горэ къыщэхъумэ, апэ гушIохэрэм сэ сащыщ.
Бэрзэдж Ларис — Теуцожь районым итхылъеджэпIэ зэхэт системэ ипащ:
— Шъыпкъэр пIощтмэ, ти­тхылъеджапIэ цIыф кIуапIэу сыдигъуи щыт. Культурэм и Унэ кружокыбэ щэлажьэ. Ахэм къякIуалIэрэ кIэлэцIыкIухэри тадэжь ренэу къычIэхьэх. Мыщ фэдэ зэхъокIыныгъэшIухэм ауж тиеджакIохэм зэхатшIэу къа­хэхъощт, сыда пIомэ уеджэзэ е уджэгузэ зыщыбгъэпсэфыным джы нахь тегъэпсыхьагъ. ­Шъхьадж шIогъэ­шIэгъон хъущтыр мыщ чIигъо­тэщт.
Гъобэкъуае фэшъхьафэу Красногвардейскэ районым ичылэу Улапэрэ Кощхьэблэ районым ит псэупIэу Майскэмрэ модельнэ тхылъеджапIэхэр мыгъэ къащызэIуахыщтых. Арэу зыхъурэм, аужырэ шапхъэхэм адиштэрэ тхылъеджэпIэ 16 республикэм иIэ хъущт.

Анцокъо Ирин.
Сурэтхэр: авторым иех.