Адыгэ Республикэм и Правительствэ и Унэ Урысые Федерацием следствиемкIэ икъулыкъухэм яIофышIэ и Мафэ ихэгъэунэфыкIын фэгъэхьыгъэ зэIукIэ щыкIуагъ. Адыгеим и ЛIышъхьэу КъумпIыл Мурат следовательхэм ямэфэкIыкIэ къафэгушIуагъ.

АР-м и ЛIышъхьэ къызэрэхигъэщыгъэмкIэ, тихэгъэгу ихэбзэухъумэкIо системэ иIоф­шIэнкIэ, урысые обществэм хэбзэгъэуцугъэр щыгъэпытэгъэ­нымкIэ следственнэ къулыкъу­хэм мэхьэнэ ин яI.
«Урысыем и Президентэу Владимир Путиным къызэрэхигъэщыгъэмкIэ, «следователэу Iоф пшIэным къикIырэр зэфагъэмрэ хэбзэгъэуцугъэмрэ адебгъэштэныр, къолъхьэ тын-Iыхыным, экстремизмэм ыкIи терроризмэм уапэуцужьыныр, бзэджэшIагъэ зыдызэрахьагъэхэм яфитыныгъэхэр къэуухъумэнхэр ары». Ащ фэдэ пшъэрылъхэм язэшIохынкIэ IэпэIэсэныгъэ ин пхэлъын, Iофэу узыфэгъэзагъэм уфэшъыпкъэн фае. Тиреспубликэ икъулыкъу­хэм яIофышIэхэм ащ фэдэ шэнхэр ахэлъых, ыпэкIэ Iоф зышIэгъэгъэ следовательхэм яхэбзэ шIагъохэр лъагъэкIуа­тэх», — къыIуагъ Адыгеим и ЛIышъхьэ.
Республикэм ипащэ къызэрэхигъэщыгъэмкIэ, следствием икъулыкъухэм яшIуагъэкIэ рес­публикэм ихэбзэухъумэкIо сис­темэрэ хэбзэ къулыкъухэмрэ зэдэлэжьэныгъэ пытэ азыфагу илъ, Адыгеир хэгъэгум ишъо­лъыр анахь рэхьатхэм, щынэгъончъэхэм ащыщ.
«Республикэр ицыхьэ зытелъы­жьэу ыпэкIэ лъыкIотэнымкIэ, цIыфхэм ящыIакIэ зыкъегъэIэтыгъэнымкIэ ащ ишIогъэшхо къэкIо. Непи, хэгъэгум анахьэу къиныгъохэр ыпэкIэ къызыщикIыхэрэ лъэхъаным, ащ фэдэу къэнэжьыным мэхьанэшхо иI. Терроризмэм, экстремизмэм, зэхэщэгъэ бзэджэшIагъэхэм апэуцужьыгъэнымкIэ мэхьанэшхо зиIэ пшъэрылъхэр зэшIотхынхэу къызэрэтпыщылъхэм имызакъоу, социальнэ лъэныкъомкIи Iофыгъо гъэнэфагъэхэр зэшIохыгъэнхэ фае. Анахьэу чIыпIэ зэжъу ит цIыфхэу гъот макIэ зиIэхэм: пенсионерхэм, сэкъатныгъэ зиIэхэм, кIэлэцIыкIухэм япхыгъэ Iофыгъохэр игъом ыкIи тэрэзэу зэшIохыгъэнхэм тынаIэ тедгъэтын фае. ХэушъхьафыкIыгъэ дзэ операцием хэлажьэхэрэм ыкIи иветеранхэм, яунагъохэм анахьэу тынаIэ атедгъэтын фае», — къыIуагъ АР-м и ЛIышъхьэ.

КъумпIыл Мурат къызэрэхигъэщыгъэмкIэ, финанс-бюджет лъэныкъомкIэ бзэджэшIагъэхэр къыхэгъэщыгъэнхэр анахьэу тынаIэ зытедгъэтын фаехэм ащыщ. Инвестициехэр нахьыбэу республикэм къихьанхэмкIэ амал дэгъухэр къэзытыщт лъэныкъохэм тяусэн фае. Экономикэмрэ хэбзэIахьхэмрэ япхыгъэ бзэджэшIагъэхэм апэшIуе­кIорэ бэнэныгъэр тапэкIи нахь дгъэлъэшын, цIыфхэм IофшIэнымкIэ фитыныгъэу яIэхэр, предпринимательхэм яфитыныгъэхэр къэтыухъумэнхэ фае.
«Анахьэу тынаIэ зытедгъэтын фаехэм ащыщых цIыфхэм ятхьаусыхэ тхылъхэр: Iофыгъоу республикэм щыпсэухэрэм къа­Iэтырэ, ахэр зыгъэгумэкIыхэрэ пэпчъ псынкIэу ыкIи тынаIэ тетэу тыдэлэжьэн фае. Непэ цIыфхэр анахь лъэшэу зыгъэгумэкIыхэрэм ащыщых яфитыныгъэхэр, яфедэхэр, ящынэгъон­чъагъэ къэухъумэгъэнхэр. Шъо шъуиIофшIэн нахь шIогъэ ин къытэу зэхашъущэ къэс, цIыфхэми хэбзэ къулыкъухэм яцыхьэ нахь ателъ хъущт, неущырэ мафэми джащ фэдэу ягугъэпIэ дахэхэр рапхыщтых. Сицыхьэ телъ тапэкIи шъузышъхьамысыжьэу, зэфагъэ шъухэлъэу шъузэрэзекIощтым, IэпэIэсэ­ныгъэ ин зыхэлъ IофышIэхэм ягъэхьазырын шъуишъыпкъэу шъунаIэ зэрэтежъугъэтыщтым», — къыIуагъ республикэм и ЛIышъхьэ.
Урысыем и Следственнэ комитет иследственнэ ГъэIорышIапIэу Адыгэ Республикэм щыIэм ипащэхэм ыкIи респуб­ликэм следствиемкIэ икъулыкъу­хэм яIофышIэ пстэуми зэрафэразэр Адыгеим и ЛIышъхьэ икIэухым къыIуагъ. Зэрифэшъуа­шэу япшъэрылъхэр зэрагъэцакIэхэрэм пае следствием иветеранхэм хэушъхьафыкIы­гъэу ирэзэныгъэ гущыIэхэр ащ афигъэзагъэх.
ШIуфэс гущыIэхэр къаIуагъэх АР-м и Къэралыгъо Совет – Хасэм и Тхьаматэу Владимир Нарожнэм, АР-м и Апшъэрэ хьыкум и Тхьаматэу Шумэн Байзэт, Урысыем и ФСБ и ГъэIорышIапIэу Адыгэ Респуб­ликэм щыIэм ипащэу Михаил Кемеровым, АР-м хэгъэгу ­кIоцI IофхэмкIэ иминистрэу Олег Безсмельницыным, УФ-м и Следственнэ комитет иследственнэ ГъэIорышIапIэу Адыгэ Республикэм щыIэм ипащэу Василий Лариным.
Ащ ыуж анахь хъупхъэу къы­хагъэщыгъэхэм афагъэшъошэгъэ тынхэр аратыжьыгъэх. Щытхъу­цIэу «Адыгэ Республикэм изаслуженнэ юрист» зыфиIорэр фагъэшъошагъ УФ-м и Следственнэ комитет иследственнэ ГъэIорышIапIэу АР-м щыIэм анахь мэхьанэ зэратырэ Iофхэм язэхэфынкIэ иотдел ипащэу Блэгъожъ Заурбый, криминалис­тикэмкIэ отделым иследователь-криминалист шъхьаIэу КIыкI Бислъан. Адыгэ Респуб­ликэм и ЛIышъхьэ ирэзэныгъэ тхылъ аратыжьыгъ УФ-м и Следственнэ комитет иследственнэ ГъэIорышIапIэу АР-м щыIэм и Тэхъутэмыкъое район следственнэ отдел ипащэу Дмитрий Жеребцовымрэ а гъэIорышIэпIэ дэдэм иинспектор шъхьаIэу Мамый Бислъанрэ.
Ащ нэмыкIэу АР-м и Къэралыгъо Совет – Хасэм, АР-м и Апшъэрэ хьыкум, Урысыем и ФСБ и ГъэIорышIапIэу Адыгэ Республикэм щыIэм, АР-м и МВД ящытхъу ыкIи ярэзэныгъэ тхылъхэр, джащ фэдэу къулыкъу шIухьафтынхэр следствием иIофышIэ заулэхэм аратыжьыгъэх.
Адыгэ Республикэм и ЛIышъхьэ ипресс-къулыкъу къытыгъэ къэбархэмкIэ
Тхьаркъохъо Сафыет.