ФутболымкIэ Къыблэ ыкIи Темыр-Кавказ шъолъырхэм язэнэкъокъухэм республикэ спорт еджапIэу «Зэкъошныгъ-2007» зыфиIорэм икомандэ финалныкъом футбол клубэу «Фортым» икомандэ апэрэ ешIэгъу щыдыриIагъ, ау текIон ылъэкIыгъэп.

Стадионэу «Юностыр» ары зыщешIагъэхэр. Я 6-рэ такъикъым Таганрог икомандэ пчъагъэр къызэIуихыгъ, Iэгуаор къэла­пчъэм дэзыдзагъэр Артем Лазарев. ЕджапIэм итренерхэу Александра Дериберинам, Пэунэжь Азамат ыкIи Юрий Манченкэм агъасэхэрэр бэрэ гуIагъэх пчъагъэр зэфэдэ ашIыжьынэу, ау ар къа­дэхъугъэп. ХьакIэхэр нахь лъэшэу къычIэкIыгъэх ыкIи ятIонэрэ таймым джыри зы Iэгуао тикомандэ икъэлапчъэ къыдадзагъ. Ар зыгъэцэкIагъэр Илья Щербак. Пчъагъэр 0:2-у ешIэгъур аухыгъ.
ТапэкIэ зичэзыу ешIэгъур Таганрог бэдзэогъум и 31-м щы­кIощт. Тикомандэ финалым ихьаным фэшI джы текIоныгъэ къодыеп ищыкIагъэр, Iэгоо дэдзэгъэ пчъагъэмкIи апэ ишъынхэ фае.