Апэрэ мафэхэр
2024-рэ илъэсым зэхащэрэ Олимпийскэ джэгунхэр Париж къыщызэIуахыгъэх.
ДжэгукIэхэм къыдалъытэрэ апэрэ хъулъфыгъэ зэнэкъокъухэр регби-7-мкIэ ыкIи футболымкIэ рагъэжьагъэх. Олимпиадэр мэфэкI шIыкIэм тетэу непэ къызэIуахы, заухыщтыр шышъхьэIум и 11-р ары. 2022-рэ илъэсым имэзэе мазэ ыкIэхэм адэжь Дунэе олимпийскэ комитетым дунэе спортивнэ федерациемэ афэкIорэ джэпсалъэ къышIыгъагъ. Ащ ар къыщыкIэлъэIугъагъ урысые ыкIи белорусскэ атлетхэр сыд фэдэрэ зэнэкъокъухэми ахамыгъэлэжьэнхэу. Арэу щытми, 2023-рэ илъэсым ыкIэхэм организацием Iизын къытыгъ урысые ыкIи белорусскэ спортсменхэр Олимпиадэ Джэгунхэм ахэлэжьэнхэ алъэкIынэу, ау къэралыгъохэр хэмытхэу, ежьхэм ацIэкIэ. Шэпхъэ гъэнэфагъи къафашIыгъ, ар загъэцэкIэрэ ужым квалификациер акIунэу щытыгъ. Урысыем иатлетхэу фитыныгъэ зэратыгъэхэм яспискэ бэдзэогъум и 18-м къэнэфагъ. Ахэр зэкIэмкIи нэбгырэ 15 зэрэхъухэрэр: кушъхьэфэчъэ спортым пылъхэу Тамара Дроновар, Алена Иванченкэр, Глеб Сырицэр, батутисткэу Анжела Бладцевар, теннисистхэу Екатерина Александровар, Мира Андреевар, Диана Шнайдер, Елена Веснинар, Даниил Медведевыр, Роман Сафиуллиныр, Павел Котовыр, каноистхэу Захар Петровыр, Алексей Коровашковыр, Олеся Ромасенкэр, есынымкIэ Евгений Сомовыр.