АР-м IофшIэнымрэ социальнэ хэхъоныгъэмрэкIэ и Министерствэ демографическэ шъолъыр форум бжыхьэм икъихьэгъум зэхищэщт. Ащ пае министерствэхэм ыкIи социальнэ Iофхэм апылъ къулыкъухэм ялIыкIохэр зыхэхьэгъэ IофышIэ куп агъэнэфагъ.

Министерствэм къызэрэщаIуа­гъэмкIэ, шъолъыр ыкIи муниципальнэ хэбзэ къу­лыкъухэр зэкIэ ащ хэлэжьэщтых. ЦIыфхэм псэукIэ амалэу яIэм нахь зыкъегъэIэтыгъэным фытегъэ­псыхьагъэу шIэгъэн фаехэм зыщатегущыIэгъэхэ площадкэ мы Iофтхьабзэр хъунэу ары пшъэрылъэу ащ иIэр.
— Iоныгъо мазэм форумыр щыIэщт. КIэлэцIыкIухэр нахьыбэу къэхъунхэм, цIыфхэм щыIэкIэшIу яIэ шIыгъэным, гъа­шIэр нахь кIыхьэ хъуным афытегъэ­псыхьэгъэ лъэныкъуибгъу ащ иIэщт. Форумым хэлэжьэщт командэхэм загъэ­хьазырынэу рагъэжьагъ, — къа­Iуагъ Iофтхьабзэм изэхэщакIохэм.
Шъугу къэдгъэкIыжьын, сабыибэ зыпIурэ унагъоу респуб­ликэм исым ипчъа­гъэ хэхъо. Непэ ащ фэдэу Адыгеим унэгъо мини 8,9-рэ щэпсэу. КIэлэцIыкIу зэрыс унагъохэр пстэумкIи мин 53-рэ мэхъу. 2024-рэ илъэсым иапэрэ мэзих пштэмэ, сабый 1952-рэ Адыгеим къихъу­хьагъ. Ар 2023-м ащ фэдэ иуахътэ къэхъугъагъэм, ар 1907-рэ, нахьыб.
КIэлэцIыкIу зэрыс унагъохэм IэпыIэгъу ятыгъэным фытегъэ­псыхьэгъэ Iофтхьэбзэ зэфэ­ъхьафхэр республикэм щыпхыращых. Ахэм зэу ащыщ лъэпкъ проектэу «Демографием» къыдыхэлъытагъэхэр. Мы илъэсым ахэм сомэ миллиарди 6,6-рэ тишъолъыр апэIуигъэ­хьащт.