Илъэсыбэ хъугъэу ны мылъкум фэгъэхьыгъэ программэр къэралыгъо IэпыIэгъоу унэгъо ныбжьыкIэхэм анахь къашъхьапэхэрэм ащыщ.

УФ-м и Социальнэ фонд и Къутамэу АР-м щыIэм къызэритыгъэмкIэ, 2024-рэ илъэсыр къызихьагъэм къыщыублагъэу Адыгеим исэу апэрэ сабыир къызэрыхъухьэгъэ унэгъо 738-мэ ны мылъкум исертификат аратыгъ.
— Къутамэм IофшIэн шъхьаIэу иIэхэм ащыщ кIэлэцIыкIу зэрыс унагъо­хэм къэралыгъом IэпыIэгъоу аритырэр аIэкIэгъэхьэгъэныр. Ны мылъкум фэгъэхьыгъэ программэр зыщыIэ 2007-рэ илъэсым къыщегъэжьагъэу республикэм сертификат мин 45-м ехъу щатыгъ. Непэ ар ны-тыхэр лъыкIожьынхэ имыщыкIагъэу, яунэ зэрисхэу афагъэпсы. Тхылъыр хьазыр зыхъу­кIэ къэралыгъо фэIо-фашIэхэм япортал щыряIэ «унэе кабинет» афагъакIо, — къыIуагъ УФ-м и Социальнэ фонд и Къутамэу АР-м щыIэм ипащэу МэщлIэкъо Хьамидэ.
Ны мылъкум къыщыдэлъытэгъэ ахъщэу апэрэ сабыир къыз­фэхъугъэхэм къаратырэр мы илъэсым сомэ 630380-м ехъугъ, ятIонэрэм е ащ къыкIэлъыкIорэм апае къатырэр сомэ 833024,74-м нэсыгъ. Апэрэ сабыир къыфэхъугъэу ны ­мылъкур къызэратыгъэ унагъом ятIонэрэр къызихъухьэкIэ сомэ 202643,96-рэ етIани къыфэкIо.
2024-рэ илъэсым ищылэ мазэ и 1-м къыщыублагъэу ны ­мылъкум исертификат къыратынэу фитыныгъэ зиIэ хъурэр кIэлэцIыкIур къызщыхъугъэ уахътэм Урысые гражданствэ зиIэгъэ ны-тыхэу, зисабый УФ-м игражданин хъу­гъэр ары. ШъолъырыкIэу къы­хэхьажьыгъэхэм ар анэсырэп. Ахэм ащыпсэухэрэм, Урысыем игражданствэ къызщаратыгъэ уахътэм емылъытыгъэу, сертификатыр афагъэпсы.
ШъунаIэ тешъотэгъадзэ, ны мылъкум къыдэлъытэгъэ ахъщэр Iэрылъхьэу къыуатырэп, сертификатыр пщэн уфитэп. Ащ фэдэ зышIэрэм уголовнэ пшъэдэкIыжь ыхьыщт.
КIэлэцIыкIу зэрыс унагъохэм социальнэ IэпыIэгъоу къатефэрэр УФ-м и Социальнэ фонд и Къутамэу АР-м щыIэм иинтернет нэкIубгъо щызэбгъэшIэн плъэкIыщт.