Аужырэ мэзитIум зэрэфэбэ дэдэм, ощх зэрэщымыIэм апкъ къикIэу Адыгеим машIо къызэрэщыхъурэр мафэ къэс пшIы пчъагъэу къэплъытэнэу хъугъэ. Ащ гумэкIыгъо къеты.

Ащ фэгъэхьыгъагъ АР-м и Премьер-министрэу КIэрэщэ Анзаур тхьамэтагъор зыщызэрихьэгъэ зэхэсыгъор. Ащ хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, ащ игуадзэу Цэй Эдуард, Правительствэм и Тхьаматэ игуадзэу ЛIыхэсэ Махьмудэ, министрэхэм я Кабинет хэтхэр, хэбзэухъумэкIо къулыкъухэм, УФ-м и МЧС и ГъэIорышIапIэу АР-м щыIэм ялIыкIохэр, муниципальнэ образованиехэм япащэхэр.
Зэхэсыгъом къызэрэщыхагъэщыгъэмкIэ, Мыекъуапэрэ Мыекъопэ районымрэ машIом пэшIуекIогъэным фэшI шэпхъэ гъэнэфагъэм ащытехьагъэх. Ащ къызэрэщыдэлъытагъэмкIэ, зыпарэми машIо ышIын, хэкIыр е уц гъугъэр ыгъэстын фитэп. Ар зымыгъэцакIэхэрэм, машIор къэмыхъунымкIэ шапхъэхэр зыукъохэрэм тазырэу атыралъхьащтыр къаIэтыгъ. МашIо щыпшIыным фытегъэпсыхьэгъэ чIыпIэхэм уц е нэмыкIэу къэкIырэ гъугъэхэр ащыбгъэстынхэр шIокI зимыIэ Iофэу зэрэщытыр зэхэсыгъом къыщыхагъэщыгъ.
Метеогупчэм къызэритырэмкIэ, фабэр джыри къеIыхыщтэп. Мафэм температурэр шапхъэхэм ашIокIыщт, чэщырэ градус 22 — 23-рэ щыIэщт. Арышъ, пэшIорыгъэшъ IофшIэныр нахь гъэлъэшыгъэн фае.
— Фабэр зэкIакIорэп, арышъ, машIор щынэгъончъэным нахь гъэлъэшыгъэу тыпылъын фае. Районхэм ыкIи къалэхэм япащэхэмрэ мы Iофым фэгъэзэгъэ къулыкъухэмрэ пэшIорыгъэшъ IофшIэныр нахь чанэу ыуж имытхэ хъущтэп. Ау зэпстэумэ анахьэу шIуагъэ къэзытыщтыр цIыфхэм Iофыр зытетыр икъу фэдизэу алъыдгъэIэсымэ ары, — къыIуагъ Владимир Нарожнэм зэхэсыгъом къызщэгущыIэм.