Урысые Федерацием шIэныгъэмрэ гъэсэныгъэмрэкIэ и Министерствэ иунашъоу N 10-01-09/155 зытетымкIэ 2024-рэ илъэсым ишышъхьэIу мазэ и 30-м къыщегъэжьагъэу 2029-рэ илъэсым ишышъхьэIу мазэ и 29-м нэс Адыгэ къэралыгъо университетым иректорэу Мамый Даутэ Iоф ышIэнэу ыгъэнэфагъ.

Шъугу къэдгъэкIыжьын, физикэ-хьисап шIэныгъэхэмкIэ кандидатэу, доцентэу Мамый Даутэ апэ АКъУ-м иректорэу зыхадзыгъэр 2019-рэ илъэсыр ары. Мыгъэ апшъэрэ еджапIэм ипащэ АКъУ-м Iоф щызышIэхэрэмрэ ащ щеджэхэрэмрэ ягъэтхэ конференцие щыхадзыгъ. Хэдзынхэм язэфэхьысыжьхэмкIэ, пащэу Iутым нэбгыри 119-м ащыщэу 99-мэ амакъэ фатыгъ.
Ащ ыпэкIэ, мэкъуогъум и 14-м, Мыекъопэ къэралыгъо технологическэ университетым ипащэу хадзыжьыгъ Къуижъ Саидэ Казбек ыпхъур. Ар мы апшъэрэ еджапIэм илъэс 30 фэдиз хъугъэу Iут, МКъТУ-м иректорэу 2013-рэ илъэсым къыщыублагъэу Iоф ешIэ.