Мэзхэм машIор къащымыгъэхъугъэным ыкIи ащ щыухъумэгъэнхэм афэшI Адыгэ мэзмэшIогъэкIосэ къэрэгъулэ къулыкъу республикэм иI. Лъэпкъ проектэу «Экологием» къыдыхэлъытэгъэ федеральнэ проектэу «Мэзхэр къызэтегъэнэгъэнхэр» зыфиIорэм ипхырыщын ишIуагъэкIэ мы учреждением иматериальнэ-техническэ зытет агъэпытэн алъэкIы.

БэмышIэу апашIэрэ мэшIогъэкIосэ модулэу МПК 2920-04-м фэдэу тIу къащэфыгъ. Мы пкъыгъор псыр е тхъурбэ зэхэгъэ­кIухьагъэу машIор агъэ­кIосэнымкIэ агъэфедэхэрэр къызэращырэ цистернэм пашIэ.
— АпашIэрэ мэшIогъэ­кIосэ пкъыгъом машIом зимыушъомбгъуным ыкIи ар псынкIэу агъэкIосэным иамал къытыщт, — къы­Iуагъ мэзмэшIогъэкIосэ къэрэгъулэ къулыкъум ипащэу М. ХъуакIом.
Модуль МПК 2920-04 зыфиIорэр мэз хъызмэтшIапIэхэм машIор къащымыгъэхъугъэнымкIэ зэрагъэфедэрэм имызакъоу, ошIэ-дэмышIэ Iофхэр дэгъэзыжьыгъэнхэмкIи, псыуцуагъэхэр ращынхэмкIи амалышIоу щыт. Чэу шIыхьагъэм псэуа­лъэр пэчыжьэми, насос станцие фэдэу ар агъэфедэн, метрэ миным фэдизэу псыр ыдзын алъэкIыщт.
Шъугу къэдгъэкIыжьын зыфэдэ къэмыхъугъэ фабэу республикэм щыIэ хъугъэм ыпкъ къикIыкIэ машIом зыкъы­штэнымкIэ я IV – V-рэ класс зиIэ щынагъо къызэрэуцугъэр. Арышъ, зэIухыгъэ машIохэр шъумышIых, хэкIхэр шъумыгъэстых, машIом зыкъыштэным ищынагъо зыхэлъ зекIокIэ пстэури мэзхэм апэгъунэгъоу щызешъухьанхэр щыжъугъэзыех.
Сурэтыр: мэзмэшIогъэкIосэ
къулыкъур