Агъэпщынагъэх
Урысыем и МВД къэбар шъэфхэмкIэ ибазэ фитыныгъэ ямыIэу зэрэхэхьагъэхэм къыхэкIэу нэбгыритIумэ уголовнэ Iоф къапагъэтэджагъ ыкIи зэхафыгъ.
Урысыем и ФСБ Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, 2023-рэ илъэсым мэзаем Мыекъуапэ щыщ горэм илъэс 69-рэ зыныбжь очылэу Фарид Сайфутдиновым (ари Мыекъуапэ щыщ) лъэIукIэ зыфигъэзэгъагъ. Ар зыфэягъэр зышъхьашыгу къипхын узыфимыт шъэфэу закон гъэнэфагъэм тетэу къагъэгъунэрэм автомобилыр зиунаем епхыгъэ къэбарыр (ахъщэ ритынышъ) къырихынышъ, къыIэкIигъэхьанэу арыгъэ. Ф. В. Сайфутдиновыр ащ къезэгъыгъ ыкIи зыфигъэзагъ инэIосэ хъулъфыгъэу МВД-м и ГИБДД Адыгэ РеспубликэмкIэ и ГъэIорышIапIэ иинспекторэу илъэс 53-рэ зыныбжь Дмитрий Куликовым. Полицием иIофышIэу ар щытыти, ар къызфигъэфеди, Урысыем и МВД иведомственнэ базэ хэхьагъ, нэужым къэбарэу ащ къырихыгъэр Ф. В. Сайфутдиновым IэкIигъэхьагъ. Адрэм ахъщэ къезытыгъэм а къэбарыр риIуагъ.
Урысыем и Следственнэ комитет Адыгэ РеспубликэмкIэ иследственнэ гъэIорышIапIэ Д. В. Куликовым Урысыем и Уголовкэ кодекс ия 272-рэ статья ия 3-рэ Iахь (фитыныгъэ имыIэу компьютер къэбарыр къызэрэзыIэкIигъэхьагъэм пае диштэу) ыкIи Урысыем и Уголовнэ кодекс ия 286-рэ статья
иа 1-рэ Iахь тетэу (иполномочиехэм къызэраригъэхъугъэм пае) уголовнэ Iоф къызэIуихыгъ ыкIи зэхифыгъ; Ф. В. Сайфутдиновым — Урысыем и Уголовнэ кодекс ия 272-рэ статья ия 2-рэ Iахь тетэу (ахъщэм кIэнэцIи фитыныгъэ имыIэу компьютер къэбарыр къызэрэзыIэкIигъэхьагъэм пае) Iофыр зэхифыгъ.
Мыекъопэ къэлэ хьыкумым ышIыгъэ унашъомкIэ Д. В. Куликовым тазырэу сомэ мини 100 тыралъхьагъ ыкIи хэбзэ ухъумэкIо къулыкъухэм илъэсрэ мэзи 6-рэ Iоф ащишIэн фимытэу ашIыгъ, Ф. В. Сайфутдиновым — тазырэу сомэ мини 100 тыралъхьагъ, очыл IофшIэныр илъэси 2 пIалъэкIэ ыгъэцэкIэн фимытэу ашIыгъ. Унашъохэм кIуачIэ яIэ хъугъэ.