Лъэхъаным елъытыгъэу, республикэм щыпсэухэу кIэтIый узхэр къызэутэкIыхэрэм япчъагъэ нахь хахъоу ыублагъ.

КIэтIый уззэпыхыныр къызхэкIыхэрэм ябиологическэ нэшанэ ар епхыгъ, джащ фэдэу ушъхьагъу тедзэхэу тыгъэ нэстырыр ыкIи хым зыщыкIохэрэ уахътэр къыхэхьэх.
Анахь шъхьаIэу ар къызхэкIырэр жэкIоцIшхыф уззэпыхыныр («ротавирусная инфекция» зыфаIорэр) ары.
— Непэрэ мафэм ехъулIэу тисы­мэджэщ кIэтIый узыр къяутэкIыгъэу нэбгыри 120-рэ фэдиз чIэлъ, а пчъа­гъэм щыщэу 52-рэ фэдизыр кIэлэцIыкIух.
Бэдзэогъум и 1-м къыщегъэжьагъэу пэтхъу-Iутхъу ыкIи кIэтIый уз нэшанэхэр зиIэ кIэлэцIыкIу 79-рэ отделением къы­чIэфагъэх, — къыIуагъ зэпахырэ узхэм зыщяIэзэхэрэ Адыгэ республикэ клиническэ сымэджэщым иврач шъхьаIэу Лъэустэнджэл Розэ.
Къэбзэныгъэм ишэпхъэ къызэрыкIохэр зэраукъохэрэр ащ ушъхьагъу фэхъухэрэм ащыщ. Арышъ, нахьыбэрэ шъуIэхэр, пхъэшъхьэ-мышъхьэхэр, хэтэрыкIхэр дэгъоу шъутхьакIых, бэшэрэбым ит псым шъуешъу, фитыныгъэ зыпылъ гъэнэфэгъэ чIыпIэхэм защыжъугъэпскIымэ нахьышIу.
Зигугъу къэтшIырэ узым инэшанэхэу ныбэ узыр, гузэIыхьэр, къэжыныр, ныбачъэр, температурэ дэкIоеныр, чъы­IалIэр, гъэретынчъэ ухъуныр шъуиIэхэ зыхъукIэ, врачхэм зафэжъугъаз.
Iэшъынэ Сусан.