Урысые Федерацием и Правительствэ иунашъокIэ мыгъэ республикэм иеджапIэхэм автобус 11 къафатIупщыщт. Ахэр муниципальнэ псэупIэхэм аратыщтых гъэсэныгъэм ылъэныкъокIэ агъэфедэнхэм пае.

Мы къэбарыр къащитхыгъ Адыгеим и ЛIышъхьэ исоциальнэ хъытыухэм. КъумпIыл Мурат къызэрэкIигъэтхъыгъэмкIэ, Урысые Федерацием и Президентэу Владимир Путиным иунашъокIэ УФ-м и Правительствэ къытIупщырэ ахъщэм ишIуагъэ­кIэ тишъолъыр гъэсэныгъэмкIэ иучреждениехэм яавтомобильхэр игъом агъэкIэжьынхэ алъэ­кIы.
«Илъэси 10-м нахьыбэ ­зыныбжь автобус тиIэп. ­Аужырэ илъэси 8-м тикъэралыгъо къыщашIырэ еджэпIэ автобуси ­102-рэ лъэхъаным диштэхэу республикэм къыIэкIэхьагъэх.
Еджэгъу илъэсым автобус 87-мэ кIэлэцIыкIу 4075-рэ зэращэ. ТэркIэ мэхьанэшхо иI Адыгеим иеджакIо пэпчъ, анахьэу къоджэ псэупIэхэм адэсхэм, зэфэдэу гъэсэныгъэ дэгъу агъотыным; еджапIэм Iэрыфэгъоу ыкIи щынэгъончъэу нэсынхэм, сыдигъуи экскурсие кIонхэ амал яIэным, творческэ ыкIи спортивнэ Iофтхьабзэхэм, олимпиадэхэм ахэлэжьэшъунхэм. Джащ пае джыри лъыдгъэ­кIотэщт ищыкIэгъэ пстэури тшIэнэу кIэлэцIыкIухэм гъэсэныгъэ агъотынымкIэ зэфэдэ амалхэр яIэнхэу. УФ-м и Президент, УФ-м и Правительствэ пшъэрылъ къытфашIырэ пстэури зэшIотхыщт, федеральнэ проектхэм тахэлэжьэщт, партиеу «Единэ Россием» игукъэкIэу «ЕджэпIакI» зыфиIорэ проектри ахэм ащыщ», — къащитхыгъ исоциальнэ нэкIубгъохэм Адыгеим и ЛIышъхьэ.