Iоныгъо мазэм аухыщт
Адыгеим исхэр псэу зашъохэрэр шапхъэхэм адиштэным фытегъэпсыхьэгъэ IофшIэнхэр республикэм щылъагъэкIуатэх.
Псыр цIыфхэм аIэкIэзыгъэхьэрэ системэр гъэкIэжьыгъэным фэшI лъэпкъ проектэу «ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу «Псы къабзэм» 2019-рэ илъэсым къыщыублагъэу республикэр хэлажьэ. 2019 — 2023-рэ илъэсхэр пштэхэмэ, псым епхыгъэу псэолъэ 27-рэ Адыгеим имуниципальнэ образованиехэм ащашIи ащатIупщыгъ.
Мы илъэсым псэолъи 6 рагъэжьагъ. Ащ зэкIэмкIи пэIухьащт сомэ миллиони 162-м щыщэу сомэ миллиони 143,3-р федеральнэ бюджетым къыхэхыгъ. Псэуалъэхэм янахьыбэм процент 50-м къыщымыкIэу IофшIэнхэр ащызэшIуахыгъэх, Iоныгъо мазэм аухынхэу гухэлъ яI.
Проектым къыдыхэлъытагъэу псыкъычIэщыпIэхэр ащашIых Тэхъутэмыкъое районым ит къуаджэу Нэтыхъуае, поселкэу Отраднэм, Теуцожь районымкIэ къуаджэхэу Нэшъукъуае, Пэнэжьыкъуае, поселкэу Лъэустэнхьаблэ, Джэджэ районым истаницэу Дондуковскэм.
— Поселкэу Новэм щыпсэухэрэм ягумэкIыгъо идэгъэзыжьын фэгъэхьыгъэ пшъэрылъыр зэрагъэцакIэрэми сынаIэ тет. Псэу зашъохэрэр шапхъэхэм адиштэным епхыгъэ IофшIэнхэр ащ щырагъэжьагъэх. Ащ фэдэ Iофыгъохэр зэшIохыгъэнхэм фэшI проектэу «Псы къабзэм» тызэрэхэлажьэрэр лъыдгъэкIотэщт. КъэкIощт илъэсым кIэу тшIымэ е дгъэцэкIэжьмэ тшIоигъохэм апае тхылъхэр мы уахътэм тэгъэхьазырых, — къыхигъэщыгъ АР-м и ЛIышъхьэу КъумпIыл Мурат.
Сурэтыр: Шэртэнэ Мурат.