Апэрэхэр аштагъэх
Мыекъопэ къэралыгъо технологическэ университетым Дзэ егъэджэн гупчакIэу къыщызэIуахыгъэм апэ щеджэщтхэр къэнэфагъэх.
Iоныгъом и 1-м къыщегъэжьагъэу мыщ студент 99-мэ еджэныр щаублэщт. Ахэр дзэ-учетнэ гъэсэныгъитIумэ афырагъэджэщтых. Апшъэрэ еджапIэм ипресс-къулыкъу къызэритыгъэмкIэ, «дзэ маф» зыфиIорэ шIыкIэм тетэу тхьамафэм зэ егъэджэнхэр кIощтых, арышъ, университетым щызэрагъэгъотырэ сэнэхьат шъхьаIэмрэ дзэ ухьазырынымрэ еджакIохэм зэдахьынхэ алъэкIыщт.
— Дзэ егъэджэн гупчэм ущеджэныр дзэ къулыкъу пхьыным рагъапшэ. Ухьазырынхэм ауж дзэ-учетнэ сэнэхьат студентым иIэу къычIэкIы. Ащ нэмыкIэу, еджакIо пэпчъ дзэ билетыр къыратыщт ыкIи сержант е рядовой цIэр иIэу УФ-м и УIэшыгъэ КIуачIэхэм язапас хагъэуцощт, — къыщыхагъэунэфыкIыгъ Мыекъопэ къэралыгъо технологическэ университетым.
Шъугу къэдгъэкIыжьын, дзэ ухьазырынымкIэ гупчи 128-рэ шъолъыр 75-мэ къащызэIуахыщт, Адыгеир ахэм ахэхьагъ. Ащ епхыгъэ унашъор Урысыем зыкъэухъумэжьынымкIэ и Министерствэ и Коллегие изэхэсыгъо щаштагъ. Мыекъопэ къэралыгъо технологическэ университетым епхыгъэ Дзэ егъэджэн гупчэм гъунэ лъызыфыщтыр Урысыем и Ошъогукосмическэ кIуачIэхэм якомандование ШъхьаI ары. Гупчэм чIэхьанхэ амал зиIэщтхэр 2023-рэ илъэсым аштагъэхэу я 2-рэ курсым исхэу очнэ шIыкIэм тетэу «бакалавриат» ыкIи «специалитет» зыфиIохэрэм ащеджэхэрэр ары.