ХэушъхьафыкIыгъэ дзэ операцием хэлажьэхэрэм апае зыухъумэхэрэ хъытыухэм яблэн къэбар жъугъэм иреспубликэ амалхэм ялIыкIохэр хэлэжьагъэх. Ар зигукъэкIыр АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет.

Хъытыухэр блэгъэнымкIэ мастер-классыр зэхэщэгъэнымкIэ IэпыIэгъу къафэхъугъэх Адыгеим и «НыбжьыкIэ Гвардие» иштабрэ Урысые общественнэ движениеу «Народный фронт» зыфиIорэм ишъолъыр отделениеу Адыгэ Республикэм щыIэмрэ.
— ХэушъхьафыкIыгъэ дзэ операцием хэлажьэхэрэм апае зыухъумэхэрэ хъытыухэр зыщаблэрэ чIыпIэ бэдзэогъу мазэм партиеу «Единэ Россием» общественнэ IэпыIэгъумкIэ и Штабэу Мыекъуапэ дэтым къы­щызэIутхыгъ. Волонтер организациехэр ыкIи цIыфэу тидзэ­кIолIхэм афэгумэкIыхэрэр тигъу­сэхэу мыщ джы хъытыухэр щытэблэх, шIушIэ IэпыIэгъоу тидзэкIолIхэм афэтыугъоихэрэм акIыгъоу ахэр афэтэтIупщых. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм ящыкIэгъэ IэпыIэ­гъур арагъэгъотыным Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат лъэшэу ынаIэ тырегъэты, — къы­Iуагъ «НыбжьыкIэ Гвардием» и Адыгэ шъолъыр къутамэ иштаб ипащэу, партиеу «Единэ Россием» и Генеральнэ совет хэтэу Бэрзэдж Асиет.

Республикэм ижурналистхэми шIушIэным яIахь халъхьанэу рахъухьагъ. Хъытыу блэнымкIэ шIыкIэр къытигъэлъэгъугъ «Народнэ фронтым» хэтэу, гупчэу «Надежный тыл» зыфиIорэм ипащэу Елена Ширинам. Бзылъфыгъэ IэпэIасэм къыIуатэрэм тедэIузэ, кIэпсэжъыехэр тыблагъэх, хъытыу Iуданэр лъапсэм пхырытщыгъ. ЗэкъэIотэгъукIэ блэным ишIыкIэ къыбгурыIон ыкIи угу иуубытэн плъэкIыщтэп. Арышъ, джыри тапэкIэ амал зиIэр мыщ фэдэ зэIукIэгъухэм ахэлэжьэщт.
Республикэ гъэзетэу «Советскэ Адыгеим» ижурналистэу Елена Юсеф хъытыур зыблагъэ­хэм ахэтыгъ.
— Мыщ фэдэ Iофтхьабзэм апэрэу сыхэлажьэ. ТиIофшIэн епхыгъэу, хъытыу зыблэхэрэм бэрэ сурэт атетхэу къыхэкIыгъ, ау а IофшIэным о ухэтыныр нэмыкI шъыпкъ. ШIушIэ IэпыIэгъум фэмыдэу, тиIэшIагъэкIэ непэ тидзэкIолIхэм тишIуагъэ ядгъэкIыныр патриотическэ нэшанэм нахь пэблагъ, — къы­Iуагъ Еленэ.
ТидзэкIолIхэм агу къыдэтщэеным, тызэракъотыр зэхядгъэшIэным непэ мэхьанэшхо иI. Тызэгъусэмэ — ТекIоныгъэр нахь къэтэгъэблагъэ!
Iэшъынэ Сусан.