ХэушъхьафыкIыгъэ дзэ операциер зырагъэжьагъэм къыщыублагъэу ащ хэлажьэхэрэмрэ ахэм яунагъохэмрэ АР-м и Къэралыгъо Совет – Хасэр IэпыIэгъу афэхъу.
ЗэшIэгъоу щымытэу, сыдигъо­кIи дзэкIолIхэм анаIэ атет, зэпхыныгъэ адыряI, ящыкIагъэу зигугъу къашIырэр охътабэ темышIэзэ арагъэгъотыным ыуж итых.
Мары АР-м и Къэралыгъо Совет – Хасэм и Тхьаматэу Владимир Нарожнэм, ащ игуа­дзэу Цэй Эдуард ыкIи Парламентым идепутатэу Владимир Тростенецкэм хэушъхьафыкIыгъэ дзэ операцием тидзэкIолIэу хэлажьэхэрэр къызкIэлъэIугъэ­хэр джырэблагъэ афатIупщыгъ. Ежьхэм яунэе ахъщэкIэ тепловизорэу къащэфыгъэр операцием хэлажьэхэрэм IэпыIэгъу ягъэгъотыгъэным анахь чанэу ыуж итхэм ащыщхэу Анжелика Кладковаямрэ Светлана Кимнатнаямрэ аратыгъ, ахэм дзэкIолIхэм ар аIэкIагъэхьащт.
Шъолъыр хэбзэихъухьэ органым ипащэ депутат пстэур мы Iофым зэрэхэщагъэм къыкIигъэ­тхъыгъ.
— Партие пэпчъ ипрограммэ, иеплъыкIэхэр, ихэдзакIохэр зэфэшъхьафых, ау зэкIэри зэфэдэу мы IэпыIэгъум хэлажьэ, сыда пIомэ лъэныкъо шъхьа­IэхэмкIэ зэпстэуми зыкIыныгъэ тхэлъ, — къыIуагъ Владимир Нарожнэм.
Анжелика Кладковаяр хэушъхьа­фыкIыгъэ дзэ операцием хэлэжьэрэ дзэкIолIым ян. Ащ къызэриIуагъэмкIэ, ар зыщыкIорэ чIыпIэм гъогогъу 37-рэ щыIагъэх.
— КIалэхэм хымэ ахэтэп. Тэтыехэм IэпыIэгъур къащедгъэ­жьэгъагъ, джы зэкIэми тадеIэ, — къыIуагъ ащ.
ТапэкIэ джыри шIушIэ IэпыIэгъоу атIупщыщтым, нахьыбэу гъомылапхъэхэмрэ псы къабзэу зэшъощтхэмрэ, зэдытегущыIагъэх. Тхьаумэфэ мафэу къэблагъэрэм шIомыкIэу ар аIэкIагъэ­хьанэу рахъухьагъ.