Илъэс къэс пенсиехэмрэ социальнэ ахъщэ тынхэмрэ къэралыгъом къеIэтых. 2016-рэ илъэсым къыщыублагъэу страхованиемкIэ пенсие къызэратэу IофшIапIэхэм аIутхэр ащ къыхиубытэщтыгъэхэп.

УФ-м и Президентэу Владимир Путиныр индексациер зынэсырэм ахэри ахэгъэхьажьыгъэнхэм джырэблагъэ кIэщакIо фэхъугъ ыкIи УФ-м и Къэралыгъо Думэ пенсиехэм афэгъэхьыгъэ хэбзэгъэуцугъэм зэхъокIыныгъэхэр фишIыгъэх. Къэралыгъом ипащэ бэдзэогъум и 8-м унашъом кIэтхагъ. Ащ диштэу УФ-м IофшIэнымкIэ ыкIи социальнэ хэхъоныгъэмкIэ и Министерствэ пенсиехэр къызэралъытэрэ шапхъэхэм зэхъо­кIыныгъэхэр афишIыщтых.
IофшIапIэ Iут пенсионерхэм япенсиехэр зэхъокIыныгъэ афэмыхъугъэу къа­факIощтыгъэхэми, индексацием къыхиубытагъэхэм къаратыщтгъагъэр зыфэдизыр ялицевой счетхэм ащыгъэнэфагъ. Джы индексацие къашIыщтыр мы уахътэм IофшIапIэм Iутхэм къаратырэ пенсиер арэп, къызфыхахъохэрэм ащыщыгъэхэемэ къафэкIощтгъагъэр ары. КъэкIорэ 2025-рэ илъэсыр ары ащ тетэу къыхэхъуагъэу къатынэу зырагъэжьэщтыр.
IофшIапIэм Iутхэм япенсиехэм къазэрахэхъощтыр щысэхэмкIэ УФ-м и Социальнэ фонд иинтернет нэкIубгъо щызэхэфыгъ. Ащ къызэрэщиIорэмкIэ, непэ, гурытымкIэ лъытагъэу, сомэ мин 17,4-рэ IофшIапIэ Iут пенсионерым ипенсие зэрэхъурэр. Аужырэ илъэсищым адрэхэм афэдэу индексацием къыхиубытэгъагъэхэемэ, ар сомэ мин 23,4-рэ зэрэхъущтгъагъэр. А пчъагъэр ары пенсионерым илицевой счет итхагъэр. Ащ къыпкъырыкIхэзэ индексациер къа­лъытэнышъ, сомэ мин 17,4-м къыхагъэ­хъощт.
УФ-м и Социальнэ фонд и Къутамэу АР-м щыIэм ипресс-къулыкъу тызэрэщигъэгъозагъэмкIэ, Адыгеим IофшIэпIэ чIыпIэ Iутэу нэбгырэ 20760-рэ пенсионерэу ис. ГурытымкIэ лъытагъэу, ахэм къафакIорэр сомэ мин 15 мэхъу. КъызэрэтIуагъэу, аужырэ илъэсищ индексацием къыхиубытэгъагъэхэемэ сомэ мин 20,2-рэ хъущтыгъ. Ащ къыпкъырыкIхэзэ къыхэхъощтыр зыфэдизыр къалъытэнышъ, сомэ мин 15-м ар къыхагъэхъощт.
Ащ пае пенсионерхэм лъэIу тхылъ атын е нэмыкI тхьапэхэр агъэхьазырынхэ ищыкIагъэп. Ау ипенсие зыщызэIукIэрэм икъэбар зэзыгъашIэ зышIоигъохэм ар зэрытхэгъэ тхылъыр яунэе лицевой счет къырахын алъэкIыщт.
ХЪУТ Нэфсэт.