Уголовнэ Iоф къыпагъэтэджагъ
«Мыекъопэ телевидением» иредактор шъхьаIэщтыгъэм уголовнэ Iоф Адыгеим къыщыпагъэтэджагъ.
Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм иIофышIэхэм зэрагъэунэфыгъэмкIэ, Адыгэ Республикэм икъэралыгъо бюджет учреждениеу «Мыекъопэ телевидением» иредактор шъхьаIэщтыгъэм IэнатIэу ыIыгъыр къызфигъэфеди, 2022-рэ илъэсым шышъхьэIум къалэу Мыекъуапэ щыщ горэ пшъэдэкIыжь зыхьырэ секретарь IэнатIэм Iуигъэхьэгъагъ.
А Iуигъэхьагъэм мазэ къэс лэжьапкIэр къыратыщтыгъ ыкIи мафэм телъытэгъэ IофшIэн сыхьати 8-м къыпкъырыкIыхэзэ нэмыкI тынхэри (зэхэубытагъэу сомэ мин 527-рэ) къыIэкIагъахьэщтыгъ, ау IофшIапIэм къакIощтыгъэп, пшъэрылъэу иIэхэри ыгъэцакIэщтыгъэхэп.
ПшъэдэкIыжь зыхьырэ секретарым ыгъэцэкIэн фаехэр «МТВ-м» щылажьэхэрэм апшъэ рилъхьагъэу редактор шъхьаIэм аригъэгъэцакIэщтыгъэх, пшъэрылъ тедзэ фэдэу агуригъаIо-
щтыгъ.
Урысыем и Следственнэ Комитет иследственнэ гъэIорышIапIэу Адыгэ Республикэм щыIэм къалэу МыекъуапэкIэ иследственнэ къутамэ Урысыем и Уголовнэ кодекс ия 285-рэ статья иа 1-рэ Iахь диштэу (ифитыныгъэхэм зэрашъхьадэкIыгъэм пае) уголовнэ Iоф къыIэтыгъ ыкIи зэхифыгъ. ДэкIын зэрэфимытымкIэ ар кIагъэтхэжьыгъ.
«МТВ-м» ипащэщтыгъэм изекIуакIэ къыфагъэзэгъэ пшъэрылъхэм апэшIуекIо, пэщэныгъэ зыдызэрихьэрэ учреждением ифитыныгъэхэмрэ ифедэхэмрэ еукъох, телевидением мылъку зэрар зэрэригъэхьыгъэм нэмыкIэу къэралыгъо учреждением иIофышIэхэм хэбзэгъэуцугъэу щыIэм цыхьэу фашIырэми къыкIыригъэчыгъ.
ХэбзэухъумэкIо къулыкъухэм IэубытыпIэ икъу зэIуагъэкIагъ. Хьыкумыр хэплъэным пае Iофыр IэкIагъэхьагъ.
Статьям къыдилъытэрэр илъэси 4 хьапс.