Бзэсэжъ Аслъанрэ Дмитрий Шмаринымрэ тагъэгушIуагъ
Атлетикэ онтэгъумкIэ Урысыем ичемпионатэу хъулъфыгъэхэри бзылъфыгъэхэри зыхэлэжьагъэхэм Адыгеим испортсменмэ медалитIу къыщыдахыгъ.
Зэнэкъокъум икъежьэпIэ шъхьаIэ Новосибирскэ бэдзэогъум и 16-м къыщыублагъэу и 21-м нэс щыкIуагъ, ащ атлет 200-м ехъу хэлэжьагъ. Адыгэ Республикэр къэзыгъэлъэгъуагъэхэр: Бзэсэжъ Аслъан, Артем Горловыр ыкIи Дмитрий Шмариныр. СпортымкIэ мастерэу Бзэсэжъ Аслъан Кощхьэблэ районым щыщ, ар килограмм 67-рэ къэзыщэчырэ купым щынэкъокъуагъ. КIырыунымкIэ ащ тыжьын медаль къыдихыгъ, къыIэтыгъэр килограмми 124-рэ. ЕкIолIэгъуитIумкIэ апэрэ чIыпIэр ыубытыным мэкIэ дэд щыкIагъэр. Аужырэ ящэнэрэ екIолIэгъум Аслъан килограмми 153-рэ къэзыщэчырэ штангэм кIэIэнэу рихъухьэгъагъ, ау ар къыфэIэтыгъэп. Анахь онтэгъоу къыIэтыгъэр — килограмми 149-рэ зэрылъ штангэр ары. Зэхэубытагъэу къэплъытэмэ ар зэрэхъурэр килограмм 273-рэ.
ЕкIолIэгъуитIукIэ ящэнэрэ чIыпIэр къэзыхьыгъэ Александр Моисеенкэу Краснодар краим щыщым къыIэтыгъэм ар килограммитIукIэ нахь макI. Санкт-Петербург къикIыгъэ Рамиль Джафаровым килограмм 278-рэ зэхэубытагъэу къыгъэлъэгъуагъ ыкIи джэрз медалыр къыдихыгъ. Урысыем ичемпион хъугъэр Краснодар краим щыщ Альберт Шарковыр ары. Альберт екIолIэгъуитIумкIэ килограмм 294-рэ къыIэтыгъ.
Килограмм 96-рэ къэзыщэчырэ купым язэнэкъокъуи гъэшIэгъонэу кIуагъэ.
Урысыем спортымкIэ имастерхэу Дмитрий Шмаринымрэ Артем Горловымрэ Адыгэ Республикэр а купым къыщагъэлъэгъуагъ. ТIуми афэлъэкIыщтыр ашIагъ. Шмариным кIырыунымкIэ килограмми 151-рэ ыIэтыгъ ыкIи яенэрэ чIыпIэ хъугъэ, ау еIункIэн-IэтынымкIэ килограмми 191-рэ ыIэтышъугъ, тыжьын медалыр къыдихыгъ. Зэхэубытагъэу ащ къыIэтыгъэр килограмм 345-рэ мэхъу, ащкIэ яплIэнэрэ чIыпIэр ыубытыгъ.
Ящэнэрэ чIыпIэр къыдэзыхыгъэ Виктор Кондратьевыр Курскэ ыкIи Тульскэ хэкухэм ацIэкIэ зэнэкъокъум хэлэжьагъ. Ащи а пчъэгъэ дэдэр ары къыгъэлъэгъуагъэр, ау хэгъэхъогъо едзыгъом къыщигъэлъэгъуагъэмкIэ ыпшъэ кIон ылъэкIыгъ.
Поселкэу Яблоновскэм щыщ Артем Горловыр джэрз медалым фэбэнагъ, ау аужырэ екIолIэгъум килограмми 191-рэ къэзыщэчырэ штангэр къыфэIэтыжьыгъэп, я 6-рэ чIыпIэм щыIэу чемпионатыр ыухыгъ, зэхэубытагъэу ащ къыIэтыгъэр килограмм 336-рэ (кIырыунымкIэ кг 156-рэ, еIункIэн-IэтынымкIэ кг 180-рэ). Килограмм 96-рэ къэзыщэчырэ купым апэрэ чIыпIэр къыщыдэзыхыгъэр Никита Хрулевыр ары (кг 354-рэ), ятIонэрэ хъугъэ Илья Луниныр (кг 353-рэ).