ЦIыфхэм ащыщхэм зэралъытэрэмкIэ, гъэзетхэм яуахътэ икIыгъ, зэкIэ непэ интернетым ибгъотэщт. Ау ахэм адемыгъэштэн плъэкIыщт, сыда пIомэ гъэзетыр IэпыIэгъу псынкIэм фэд. Уигупсэ район къи­-
хъухьэрэ хъугъэ-шIагъэхэр зэкIэ псынкIэу къыплъыIэсынхэмкIэ, адми­ни­страцием гухэлъэу иIэхэм уащыгъозэнымкIэ ащ ишIуагъэ къэкIо, уинэIуасэхэм, къыппэблагъэхэм, IэпыIэгъу зищыкIагъэхэм ыкIи нэ­мыкIхэм афэгъэхьыгъэ тхыгъэхэри къыплъэIэсых.

Непэ зигугъу къэсшIыщт цIыфым ищыIэныгъэ зэрэпсаоу гъэзетым епхыгъагъ. Ар Ана­толий Матвиенкэу илъэс 50-м ехъурэ Тэхъутэмыкъое районым ихъугъэ-шIагъэхэр къэзытхы­хьагъэхэр ары. Илъэс 90-м ехъугъэ журналистыр псэупIэу Инэм дэс.
Заор къызежьэм, Анатолий Матвиенкэр зэрыс унагъор Уз­бекистан щыпсэущтыгъ. Апэ­рэхэм ахэтхэу ышитIу — Бо­рисрэ Владимиррэ заом Iухьэ­гъагъэх. Ахэм дзэ училищыр къаухыгъэу щытыгъ. Ятэ ыныбжь зэрэхэкIотагъэм къы­хэкIэу заом хэлэжьэнэу хъу­гъэп. Хъулъфыгъэу зэон зылъэкIыщтыр зэкIэ дащыгъагъ. Къэнэгъагъэхэр лIыжъхэр, кIэлэцIыкIухэр ыкIи бзылъфыгъэхэр ары. Хъулъфыгъэхэм бзыуцыфыр Iуахыжьыщтыгъ, бзылъфыгъэхэм заом Iутхэм апае щыгъын фабэхэр адыщтыгъэх. Заор аухи уIагъэхэр зытелъ ышыхэм къызагъэзэжьым, унагъор Пшызэ шъолъыр къэкощыгъэу щыпсэу­щтыгъ. ЯIахьылхэу псэупIэу Афипскэм дэсхэм адэжь къагъэзэжьыгъагъ.
Анатолий урысыбзэмрэ лите­ратурэмрэ лъэшэу ыгукIэ пэ­благъэхэу къэтэджыгъ. А лъэ­хъа­ным Шолоховым ытхыгъэхэм еджапIэхэм мэхьанэшхо щаратыщтыгъ. ЧIыпIэ гъэзетым шъэожъыем итхыгъэ цIыкIухэр къырагъахьэхэу рагъэжьагъ. Сэнаущыгъэ зыхэлъ кIалэм ежь-ежьырэу баяным къыри­гъэIонэу зигъэсагъ. Нэужым мэкъумэщ институтым чIэхьагъ. Ау ыгукIэ ренэу журналист хъуным кIэхъопсыщтыгъ. Москва дэт къэралыгъо универси­тетым журналистикэмкIэ ифакультет чIахьэ шIоигъуагъ. Ау а лъэхъаным ятэ дунаим ехы­жьыгъ, янэ сымаджэ хъугъэ ыкIи зыкIэхъопсыщтыгъэр къыдэхъугъэп.
ПсэупIэу Инэм дэсхэ зэхъум, культурэм и Унэу Тэхъутэмыкъуае дэтым иIофышIэхэу кIа­лэр музыкэм зэрэфэщагъэр зышIэхэрэм художественнэ са­модеятельностым ар къыха­гъэлэжьэнэу рахъухьагъ. ТIэ­-
кIу-тIэкIузэ культурэм и Унэ ихудожественнэ пащэу ар хъугъэ. Кружокыбэ а лъэхъаным зэхащэгъагъ, цIыфхэри лъэшэу ягуапэу ахэм ахэлажьэщтыгъэх. Арэу Iофхэр дэгъоу зэпыфэ­щтыгъэх нахь мышIэми, ежь ыгукIэ зыкIэхъопсыщтыгъэр журналистикэр арыти, зэпимыгъэоу ащ итхыгъэхэр гъэзетым фигъэхьыщтыгъэх. Бэ темышIэу район гъэзетым Iоф щишIэнэу А. Матвиенкэр рагъэблэгъагъ. ИIэпэIэсэныгъэ елъытыгъэу пшъэдэкIыжь зыхьырэ секретарь IэнатIэм ар Iуагъэхьагъ. Итхыгъэхэм критикэ ахэлъэу щы­тыгъ, пащэхэм яIофшIэн щыкIагъэу хилъагъохэрэр шъхьэихыгъэу къытхыщтыгъэх. Зы лъэ­хъан горэм «районкэхэр» зэхагъэхьажьыгъагъэх. Ащыгъум Шытхьалэ икорреспондентэу

ежь хъугъагъэ. Километрэ шъэ пчъагъэ электричкэкIэ зэпичын фаеу хъущтыгъ. Статья дэгъу къытхын фаеу зыхъукIэ, сыд ишIыкIэми, зыдэкIон фаер ­чы­жьэми, нэсыщтыгъ. Хэбзэ къулы­къухэр егупшысэжьхи, гъэзетхэр район пэпчъ къыдигъэкIызэ ышIынхэу агъэнэфэ­гъагъ. ИкIэрыкIэу зэхащэжьыгъэ район редакцием ЛIыIужъу Ма­риет Даутэ ыпхъур ары редактор шъхьаIэу фашIыгъагъэр. Ащ ыпэкIэ партием ирайком исекретарэу ар щытыгъ. Пшъэ­дэкIыжь зыхьырэ секретарэу Анатолий Матвиенкэм ипшъэ­рылъхэр дэгъоу къыгурыIохэзэ, шIэныгъэу, амалэу иIэр рихьы­лIэзэ, нахь гъэшIэгъонэу гъэзетыр зэрэхъущтым дэмышъхьахэу ыуж итыгъ. Ащ итхыгъэхэм цIыфхэр къяжэщтыгъэх. Политикэм, экономикэм, культурэм, спортым ыкIи нэмыкIхэм афэгъэхьыгъагъэх Матвиенкэм къы­гъэхьазырыщтыгъэхэр. Я 90-рэ илъэсхэм къолъхьэ тын-I­ыхыным нахь зиушъомбгъоу ригъэжьэгъагъ. Журналистхэм ахэр къыхагъэщынхэмкIэ, игъэ­кIотыгъэу къатегущыIэнхэмкIэ пэрыохъухэр къафыкъокIы­щтыгъэх. Ау Анатолий Сергей ыкъом зэфагъэм ренэу дыригъаштэщтыгъ.
ТехнологиякIэхэр къызежьэ­хэм, чIыпIэ типографиер ямыщыкIэгъэжь хъугъагъэ, гъэзетыр Мыекъуапэ щытырадзэщтыгъ. Электрон шIыкIэм тетэу редакцием тхыгъэхэр щыхахыщты-­
гъэх. Анатолий гъэзетым Iут пстэуми анахьыжъыгъ. Техникэр икъоу ыIэ къыримыгъэхьэшъуным тещыныхьи, IукIыжьынэу ыгу къэкIыгъагъ, ау тхэным зыгуи зыпси хэлъыгъэ журналистым игъорыгъозэ компьютерри ыIэ къыригъэхьагъ ыкIи илъэс заулэрэ Iоф щишIэжьыгъ.
Гъэзетым иредактор шъхьаIэщтыгъэ ПратIэкъо Зубер — жур­налист IэпэIэсэ дэдэу щыты­гъэр игуапэу Анатолий ыгу къегъэ­кIыжьы. Ар цIыф зэфагъ, кIэ горэм ренэу лъыхъущтыгъ. Ежь гъэзетым щылажьэхэрэми яIэшъхьэтет уасэ фашIыщтыгъ, ре­нэу къотыгъэх.
— ПшъэдэкIыжь зыхьырэ секретарым ежь ышъхьэкIи ипшъэрылъхэр тэрэзэу ыгъэцэкIэнхэм зэрэдэмышъхьахырэм дакIоу Iоф зыдишIэхэрэми къатефэрэр агъэцэкIэным ынаIэ тетыгъ. Гъэзетыр тэрэзэу ыкIи игъом къызэрэдэкIыщтым сицыхьэ телъыгъ, — ыгу къэ­кIыжьыщтыгъ Зубер Гъу­чIы­псэ ыкъом.

Сурэттехэу илъэсыбэрэ гъэзетым щылэжьэгъэ ХъокIо Юрэ игукъэкIыжьхэм шъуащызгъэ­гъозэн: «Анатолий Матвиенкэм илъэс 30-м ехъурэ Iоф дэсшIагъ. Зыфэгъэзэгъэ Iофым хэшIыкIышхо фыриIэу, IэпэIэсэныгъэ ин хэлъэу ар щытыгъ. Удэлэжьэныр, упчIэжьэгъу пшIы­ныр ежьми игопагъ. Гъэзетым щылажьэхэрэм зэранахьыжъым къыхэкIэу IофшIэным шъэфэу хэлъхэр ныбжьыкIэхэм алъи­гъэIэсын, щыкIагъэу афэхъухэ­рэр зыдаригъэшIэжьын ылъэ­кIыщтыгъ.
СССР-м, РСФСР-м, нэужым Адыгеим яжурналистхэм я Союз хэхьэгъэ апэрэ журналистхэм АдыгеимкIэ ащыщыгъ Матвиенко Анатолий.
Ар РСФСР-м ижурналистхэм я Союз ишIухьафтын, «Золотое перо Кубани» зыфиIорэм ялауреатыгъ, «Урысые печатым ия 300-рэ илъэс» зыцIэ щытхъу тамыгъэр къыфагъэшъошагъ, нэмыкI тын лъапIэхэри иIэх.
Зигъэпсэфынэу Матвиенкэ Анатолий зэтIысыжьым, хатэм епхыгъэ Iофтхьабзэхэм нахь зафигъэзагъ. Ау илъэс 90-м укъызехъукIэ, узыфаемрэ пкIуа­чIэ къыхьырэмрэ зэдимыштэ­жьэу мэхъу. Ишъхьэгъуси бэшIагъэ зыщымыIэжьыр. Илъфыгъэхэми унагъохэр яIэ хъугъэ. Непэ А. Матвиенкэр ыпхъу хэс. Ыныбжь емылъытыгъэу, мафэу къэсырэм фэчэфэу пэгъокIы. Игупсэ гъэзетри щыгъупшэрэп. Районым ия 100-рэ илъэс зыфэзыгъэхьазырырэ иIофшIэгъу­гъэ­хэми ащэгушIукIы, Тэхъутэмыкъое районым ихэхъоныгъэ ежь иIахьи зэрэхишIыхьагъэм рэгу­шхо. Редакцием щылажьэ­хэрэм А. Матвиенкэр ащыгъу­пшэрэп, къылэжьыгъэ уасэ фашIы.
АкIэгъу Разыет.
Тэхъутэмыкъуй.
Сурэтхэр: А. Матвиенкэм ихъар­зынэщ.