Адыгэ къэралыгъо университетым истудентэу ЖакIэмыкъо Ислъам ыгъэхьазырыгъэ короткометражнэ фильмэу «ЦIыфыр» зыцIэр Канадэм икъалэу Торонто щыкIорэ кинофестивалэу «WideScreen Film» зыфиIорэм ифинал ызыплIанэрэ Iахь ихьагъ.

— Фестивалыр шэкIогъум и 7-м къызэIуахыщт. Жюрим итхьамэтэщтыр «Убить Билла», «Не грози Южному централу» зыфиIорэ фильмхэмкIэ Урысыем щызэлъашIэгъэ актрисэу Вивика Фокс. Ащ сызэрэрагъэ­блэгъагъэр сызэмыжэгъэ гушIуа­гъу, сыда пIомэ фильмыр блэкIыгъэ илъэсыр ары къызагъэлъэгъуагъэр, — къыIуагъ Ислъам.
Адыгэ къэралыгъо университетым ипресс-къулыкъу тызэрэщигъэгъозагъэмкIэ, фильмэу «ЦIыфыр» зыфиIорэр илъэситIукIэ узэкIэIэбэжьмэ тыра­хыгъ. КIэлэ ныбжьыкIэу нервэ пакIэхэм ащыщхэр («нервные окончания») зыфаIохэрэр имыIэхэу къэтэджыгъэм ар къытегущыIэ. Сыд фэдэрэ шIэныгъи ащ такъикъ заулэкIэ къыIэкIахьэщтыгъ, ау ыгу е ышъхьэ къихьагъэр къыгъэлъэгъон амал иIагъэп. ЦIыф пстэумэ афэдэ хъужьыным пае операцие ышIынэу игъо къыфалъэгъугъ. Фильмым хэлэжьагъэх УдыкIэко Ислъам, Анастасия Некоз, Элеонора Старковар, Владислав Клевогиныр ыкIи Михаил Нуреевыр.
Кинокритикхэмрэ экспертхэмрэ фильмыр агу рихьыгъ. «Мечта» зыфиIорэ Дунэе кинофестивалэу Москва щыкIуагъэ­мрэ Нью-Джерси (США) щызэхащэгъэгъэ кинофестивалэу AWIFFT зыфиIорэмрэ яфинал ар нэсыгъагъ, фестивалэу «Киношокым» «Короткометражнэ фильмэ анахь дэгъу» зыфиIорэ цIэр къыщихьыгъ, кинофестивалэу ZOV «Социальнэ фильмэ анахь дэгъум» къыщыфагъэшъо­шагъ.
Джащ фэдэу Великобританием щыкIогъэ Дунэе кинофестивалым, короткометражнэ кином ифестивалэу къалэу Калининград щызэхащэгъагъэм ахэлэжьагъ. Адыгеим щыкIогъэ фестиваль-зэнэкъокъоу «Адыгеир, шIу усэлъэгъу!» зыфиIорэм илъэныкъоу «Игровой фильмым» ятIонэрэ чIыпIэр щиубытыгъ.
А зэпстэумэ анэмыкIэу ЖакIэмыкъо Ислъам Феодосийскэ дунэе фестивалым «Лучший режиссерский дебют-2022» зыфиIорэ тыныр къыщихьыгъ. Фильмыр кином и Унэу Москва дэтым ыкIи Великобританием икиностудиеу «Pinewood Studios» зыфиIорэм къащагъэлъэгъуагъ.
Ислъам ятIонэрэ художественнэ фильмэу тырихыгъэм «Последнее дело Вивьена» зэреджагъэр. ИIэшIэгъитIуми интернетым ущяплъын плъэ­кIыщт.