Адыгеим предпринимательхэм IэпыIэгъоу ащыратырэм ащыщ зэнэкъо­къухэр, къэралыгъо щэфынхэр зызэхащэхэкIэ бизнес цIыкIум ыкIи гурытым щылажьэхэрэм Iоф ирадашIэрэр. Ащ мы лъэныкъом хэхъоныгъэхэр ышIынымкIэ ишIуагъэ къэ­кIо.
Статистикэм къызэригъэлъэгъуагъэмкIэ, мы илъэсым иятIонэрэ мэзищ пштэмэ, Федеральнэ хэбзэгъэуцугъэу N-у 223-м диштэу щэфэкIо инхэм бизнес цIыкIум ыкIи гурытым къыщащэфыгъэр, гъэрекIо, ащ фэдэ иуахътэ егъэпшагъэмэ, процент 74-кIэ нахьыбэ хъугъэ. ГущыIэм пае, блэкIыгъэ илъэсым иятIонэрэ квартал бизнес цIыкIум ыкIи гурытым къыщащэфыгъэм сомэ миллиардрэ миллион 36-рэ пэIухьэгъагъэмэ, мыгъэ ар сомэ миллиарди 2,37-рэ хъугъэ. Шъыпкъэ, предпринимателэу къэралыгъо «закупкэхэм» ахэлажьэхэрэм япчъагъи 155-м нэсыгъ. ГъэрекIо 115-рэ хъущтыгъэх.
Шъугу къэдгъэкIыжьын, компаниеу къэралыгъом иIахь зыхэлъхэм илъэ­сым процент 25-м къыщымыкIэу бизнес цIыкIум ыкIи гурытым щылажьэхэрэм къащащэфынэу пшъэрылъ афашIыгъ. Ар гъэцэкIагъэ зэрэхъурэм сатыушIхэм я Корпорациерэ шъо­лъыр хэбзэ органхэмрэ лъэплъэх.
УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Бизнес цIыкIур ыкIи гурытыр» зыфиIорэр гъэцэкIагъэ зэрэхъурэр къэзыушыхьатырэ къэгъэлъэгъонхэм «закупкэу» ашIыгъэр зыфэдизри ахэхьэ.