ЦIыфхэм игъэкIотыгъэу диспансеризациер акIуным епхыгъэ IофшIэныр Адыгеим щылъэкIуатэ. Мы мэхьанэ зиIэ Iофтхьабзэр лъэпкъ проектэу «Псауныгъ» зыфиIорэм ипхырыщын къыдыхэлъытагъ.

ИгъэкIотыгъэ диспансеризацием уплъэ­кIун зэфэшъхьафхэр къыхеубытэх: лъым изытет игъэкIотыгъэу, жьы къызэращэрэм (сатурацием) игъэунэфын флюорографиер, электрокардиограммэр, нэмыкIхэри. Псауныгъэм изытет иуплъэ­кIун иапэрэ едзыгъо зэхъокIыныгъэхэр цIыфым иIэу къызигъэлъагъокIэ, ащ елъытыгъэу ятIонэрэ едзыгъом врачым ар егъакIо. Мыщ нахь игъэкIотыгъэ уплъэкIунхэр хэхьэх.
АР-м псауныгъэр къэухъумэгъэнымкIэ и Министерствэ къызэритыгъэмкIэ, рес­публикэм щыпсэурэ нэбгырэ мин 75-м ехъумэ диспансеризациер акIугъ, ащ ызыщанэр Мыекъуапэ щыщых.
Зэшъхьэгъусэхэ Громскэхэу Олегрэ Жаннэрэ Мыекъопэ къэлэ IэзапIэу N1-м диспансеризациер щакIоу тащыIукIагъ.
— ТыныбжьыкIэ илъэс 50-м тыкъы­шIокIыгъ, ащ елъытыгъэу гу, шъхьэ, кIоцI узхэм тагъэгумэкIэу къыхэкIы. Типсауныгъэ тыуплъэкIунымкIэ диспансеризациер Iэрыфэгъоу тлъытагъэ ыкIи уплъэкIунхэм ащыщхэр тшIыгъахэх. Чэзыум бэрэ тыхэтыгъэп, терапевтым тхьапэхэр къытфыритхыкIыхи, уахътэм ехъулIэу тякIолIагъ. Джы кIэух зэфэхьысыжьхэм тяжэщт, — къыIуагъ Жаннэ.
Шъугу къэдгъэкIыжьын, уплъэкIунхэр нэбгырэ пэпчъ ышIынхэ амал иI, ащ пае зыщыпсэурэ чIыпIэм елъытыгъэу зэпхыгъэ IэзапIэм зыфигъэзэщт е къэ­ралыгъо фэIо-фашIэхэм япорталкIэ чэзыум зыхитхэщт. Ащ ыуж ищыкIэгъэ тхьапэхэр IэзапIэм къыщыратыщтых.
ИгъэкIотыгъэ уплъэкIунхэм къагъэлъэгъорэ кIэуххэм ялъытыгъэу ищыкIэгъэ Iэзэныр ыкIи медицинэ зэтегъэуцожьын Iофтхьабзэхэр врачым къыгъэ­нэфэщтых.
Iэшъынэ Сусан.