Мыекъопэ ипподромым шыгъэчъэ мэфэкIышхоу «Адыгэ Республикэм ишIухьафтын инэу Дерби» зыфиIорэр бэдзэогъум и 21-м щыкIуагъ. Гъэмафэм шыгъачъэр зэрэрагъэкIокIыгъэр бэхэмкIэ ошIэ-дэмышIагъ, ау гуапэ ащыхъугъ.

Шы лъэпкъ къабзэхэр зыхэлэжьэгъэхэ шыгъэчъэ гъогуони 7 программэм къыдыхэлъытэгъагъ, шIухьафтын фондым сомэ 1150000-рэ илъыгъ. Лъэныкъоу зыщызэнэкъокъугъэхэр: «ШIухьафтын ин», «Шы лъэпкъ къабзэхэр зыIыгъ заводым ыцIэкIэ шIухьафтын», «Критериумым» ишIухьафтын», «Адыгэ Республикэм ишIухьафтын инэу Дерби», «Элитэм ишIухьафтын», «Мыекъо­пэ ипподромым ыцIэкIэ шIухьафтын». Метрэ 1000-м къыщегъэ­жьагъэу 2400-м нэс гъогууанэмэ якIыхьэгъагъ.
«Адыгэ Республикэм ишIухьафтын инэу Дерби» зэрылъыгъэ къэгъэчъэн шъхьаIэр яплIэнэрэу щытыгъ. Ащ текIоныгъэ къыщыдэзыхырэмэ апае фондым сомэ мин 500 къыщыдэлъытэгъагъ. Илъэсищ зыныбжь шы лъэпкъ къабзэхэу 4 ащ хагъэлэжьагъ. ЗэкIэмэ анахь псынкIэу метрэ 2400-рэ хъурэ гъогур къэзыкIугъэр шIуцIэ-пцIэгъоплъ хакIоу «Фантастик бой» зыцIэр ары, шыкъэгъачъэу ар зыгъэIорышIагъэр Щыгъущ Айдэмыр. Гъогу­уанэм такъикъи 2-рэ нэгъэупIэпIэгъу 32-рэ уахътэу тырагъэкIодагъэр. Мы шыр шыгъачъэхэм захэлажьэрэм къыщыублагъэу мыр ящэнэрэ текIоныгъэ хъугъэ. ЯтIонэрэ чIыпIэр зыхьыгъэр Эскиз Чарм, Итс Модерн Эклипс ящэнэрэу къэсыжьыгъ.
Спортивнэ зэнэкъокъухэр концерт программэм къыгъэкIэрэкIагъэх, ащ Адыгэ Республикэм итворческэ купхэр хэлэжьагъэх. КIэлэцIыкIухэм апае программэ гъэшIэгъон зэхащэгъагъ, джэгукIэ зэфэшъхьафхэри зэнэкъокъухэри ащ хэтыгъэх.

ЗэхэщакIохэм — шыхэр зыIыгъ­хэм я Ассоциациерэ физическэ культурэмрэ спортымрэкIэ Адыгэ Республикэм и Комитетрэ - мыщ фэдэ шыгъэчъэ зэнэкъокъухэр нахьыбэрэ рагъэкIокIыхэзэ ашIынэу рахъухьэ. Республикэ ипподромым испортивнэ Iофтхьаб­зэмэ инджылыз къэгъэчъэш ­лъэпкъ къабзэхэр ахэгъэлэжьэнхэмкIэ лицензие щыIэ зэрэхъугъэм а Iофыгъор нахь къафигъэ­псынкIагъ. Джы мыщ къыщычъэ­рэмэ къыдахырэ текIоныгъэхэр официальнэкIэ агъэкIощтых ыкIи рейтингхэр къафагъэшъошэщтых. Ащ ишIуагъэкIэ Адыгеим шыгъэ­чъэш анахь дэгъоу иIэхэр къэ­нэфэщтых, ахэр нэмыкI зэнэкъо­къу инхэми ахэлэжьэшъущтых. НэмыкI шъолъырхэм ащыщхэу IэпэIэсэныгъэшхо зыхэлъхэри Мыекъопэ шыгъэчъэ зэнэкъокъу­хэм нахьыбэу къахэлажьэхэ ­хъущт. А IофыгъошIухэр социальнэ нэкIубгъохэм къащыриIоты­кIыгъ Адыгеим и ЛIышъхьэу КъумпIыл Мурат.