Эпидемиологиемрэ къэбзэныгъэмрэкIэ Адыгэ Республикэм и Гупчэ икомандэ Мыекъуапэ иIофышIэ купхэм я Спартакиадэу 2024-рэ илъэсым рагъэкIокIырэм пэрытныгъэр щиубытыгъ.

Спартакиадэр волейбол зэнэкъокъухэмкIэ рагъэжьагъ, ар Адыгэ къэралыгъо университетым щыкIуагъ. Адыгеим икъэлэ ­шъхьаIэ иорганизации 6 ащ хэлэжьагъ. Пхъэдзым къызэригъэлъэгъуагъэм елъытыгъэу купитIумэ ахэр ахэхьагъэх. Купэу А-м хэфагъэмэ ащытекIуагъэр къыхэгъэщыгъэным пае партиехэр къэлъытэжьыгъэнхэ фаеу хъугъэ, сыда пIомэ, депутатхэр гъэсэныгъэм илIыкIохэм атекIуа­гъэх, эпидемиологиемрэ къэбзэныгъэмрэкIэ Гупчэм икомандэ депутатмэ ешIэгъур къашIуа­хьыгъ. Зэфэхьысыжьхэр зашIыхэм, эпидемиологиемрэ къэ­бзэныгъэмрэкIэ Адыгэ Респуб­ликэм и Гупчэ икомандэ финалым ихьагъ ыкIи ащ кIэлэцIыкIу IыгъыпIэу N 56-м икомандэ пчъагъэр 2:1-у щытекIуагъ. Ящэнэрэ чIыпIэм пае гъэсэныгъэмкIэ Комитетыр кIэлэцIыкIу IыгъыпIэу N 7-у «Теремок» зыцIэм дешIагъ ыкIи текIуагъ.

Спартакиадэм иятIонэрэ едзы­гъоу тапэкIэ щыIэщтыр есыным фэгъэхьыгъэщт, ар бэдзэогъум и 27-м зэхащэщт. ЗэкIэмкIи Спартакиадэм спорт лъэпкъи 6 хэхьэ.