Пэнэжьыкъуае щыпсэухэрэм ялъэIукIэ, яшIоигъоныгъэкIэ мыр къэсэтхы. ЦIыфхэр ары дэгъу пшIагъэми, дэеу узекIуагъэми къэзылъэгъущтхэр, узгъэдэгъущтхэр.

ИжъыкIэ къыщыублагъэу адыгэм къыкIэхъухьэрэ ныб­жьыкIэмэ ынаIэ атыригъэтыгъ, непи ары зэрэщытыр. «Ахэр ары хабзэр зыIыгъыщтыр, тэри тызыIыгъыжьыщтыр», — аIо.
Пэнэжьыкъуае еджэпIакIэр къызыщызэIуахыгъэр 2001-рэ илъэсыр ары. Ащ щегъэжьагъэу, чылэм ызыныкъу пIоми хъунэу, почтэм узщынэсырэм къыще­гъазэшъ, машинэхэр рыкIонхэу гъогу ашIыгъ. ЕджапIэр дыре­кIошъ, джа гъогумкIэ кIэлэеджа­кIохэр, машинэмэ ахэтхэу, еджа­пIэм кIощтыгъэх. А гъогум къыготэу, псэу унашъхьэмэ къя­чъэхырэм диутыгъэу псыр рэ­чъэ. ЕджэкIо щагоу къэшIыхьагъэмрэ псыр зэрычъэрэмрэ азыфагу чIыгу щылъыгъ цIырау закIэу, гъатхэ хъумэ аупкIэу. Джа чIыгур районым ипащэ аригъэукъэбзи, асфальт тырари­гъэлъхьагъ. Почтэм дэжь къыз­щыбгъэзэщтым, джа хьалыгъуа­нэу псыр зэрычъэрэм лъэмыдж цIыкIу тыраригъалъхьи, убытыпIэхэр иIэу зэпырыкIыпIэ фаригъэшIыгъ. Джа хьалыгъуанэм готэу, гъучIым хэшIыкIыгъэу, гъэлэжьыгъэу, чэу мылъагэ Iуа­ри­гъэшIыхьагъ. Джы еджакIохэр щынэгъончъэу еджапIэм екIуалIэх.
Чылэ пчэгумкIэ гъогур къызэ­пыпчэу еджапIэм укъызщекIущтым гъогу бгъуитIум зырызэу еджэкIо шъуашэхэр ащыгъэу, еджэкIо Iалъмэкъхэри ашIохэлъагъэхэу «еджакIохэр» тырагъэуцуагъэх.
Пчэгуми тыкъынэсыгъэшъ, къыхэдгъэхъон: культурэм и Уни агъэкIэрэкIагъ, ыIупи плиткэхэр Iуалъхьэхи, къэгъагъэхэр арытхэу къошынхэри Iуагъэуцуагъэх, ащ къыдекIужьхэу тIысыпIэ­хэ-
ри Iуагъэуцуагъэх. Паркыр къэ­бзэ-лъабзэу зэкIаукъэбзагъ. Уц шIойми тытеплъэжьырэп, улъы­хъугъэкIи бгъотыжьынэп.

Нэчэрэзые укIо хъуми къэу щылъыр дэгъоу аукъэбзыгъ. Стадион дэгъуи зэтырагъэ­псыхьагъ. Адыгэ Республикэм имытынкIи хъун ащ фэдэ стадион. Районым ит чылагъомэ къарыкIхэзэ цIыфхэр пчыхьэрэ къакIох гъэпсэфыпIэкIэ, спорт джэгупIэхэри иIэх.
Мэкъуогъум и 1-м кIэлэцIыкIухэм якъэухъумэн и Дунэе мафи а стадионым щыхагъэу­нэфыкIыгъ. ЗэкIэ кIэлэцIыкIоу районым исхэр щызэрагъэугъоихи мэфэкIыр щагъэкIуагъ.
Асфальт гъогу дэгъухэр къуа­джэм иIэх, ау къогъупэхэр къэ­нагъэхэти, ахэми анэсыгъэх, асфальт арагъэкIугъ. Анахьэу сызфэгушIохэрэр кIэлэцIыкIухэр ары: кушъхьэфачъэмкIэ ма­чъэх, роликмэ атетых, самокатхэри ахэтых; уяплъынкIэ тхъа­гъо, гъэмэфэ тхъагъо къа­фэкIуагъ.
Район ныбжьыкIэм апэрэ па­щэу иIэгъэ Хъут Теуцожь
ри­гъэ­жьэгъэгъэ Iофыр лъагъэ­кIуатэ.

Пэнэжьыкъуае изакъоп, чылэгъо пстэуми заужьыжьы. Мы зэпстэури респуб­ликэ пащэ-
хэм, чIыпIэхэм ащылажьэхэрэм яшIушIагъ. Тэ ти­псэупIэ непэ къа­хэсэгъэщы нэр ыгъэгушIоу, цIыфхэмкIэ гуIэ­тыпIэу, Iэрыфэгъоу хъугъэшъ. Тафэраз тичылэ, тирайон пащэхэм, пстэуми гу алъызытэ­хэрэм, Адыгеим и ЛIышъхьэу чIыпIэхэр къыкIу­хьэ­хэзэ Iофхэм язытет ежь ышъхьэкIэ зыу­плъэкIурэм. Пстэуми аIэ зэкIэ­дзагъэу зэдэлажьэх ыкIи ащ уимыгъэгушIон плъэкIырэп — ар нэры­лъэгъу IофшIэн.
Кощэгъу Нурыет.
Пэнэжьыкъуай.
Сурэтхэр:
Кощэгъу Тамерлан.