Адыгеим ичIыопс дэхэ дэд. КъэкIырэ къэгъагъэхэм гъэ­т­хапэм къыщегъэжьагъэу бжыхьэм нэс зызэрэзэбла­хъу­рэм улъыплъэн плъэкIыщт.

Поселкэу Тульскэм щыIэ псыутIэм псыгуIанэхэр къыщызэIуихыгъэх. Ахэр бэдзэогъу ыкIи шышъхьэIу мазэхэр ары зыкъэгъагъэхэрэр.
ПсыгуIаныр Урысыем и Тхылъ Плъыжь дагъэхьагъ. Мыр зипчъагъэкIэ макIэ хъурэ ыкIи кIодыжьырэ къэгъагъэу Пшызэ шъолъырым ыкIи Адыгеим ипсыу­тIэмэ къащыкIырэмэ ащыщ. Ащ икъэу­хъумэн мэхьанэшхо иI, сыда пIомэ хьэцIэ-пIацIэхэмкIэ гъомылэпхъэ къэ­кIуапIэ мэхъу. Ащ нэмыкIэу, къэгъагъэм кIэхэмкIэ зеушъомбгъу, арышъ, икъэгъэ­гъэгъу лъэхъан зыпыпчырэм, ипчъагъэ лъэшэу къыщыкIэн ылъэкIыщт.
ПсыгуIаныр тыгъэр къызыкъокIырэм дахэу къызэIуехы. Пчыхьэм тыгъэр зы­щыкъохьажьырэм итхьапэхэр зэфешIы­жьых. Илъэсым ианахь фэбэ лъэхъаным къызэрэкIырэм емылъытыгъэу, тыгъэ­нэ­бзый лъэшхэм агъэгъуанлэрэп.
Къэгъэгъэ кIэракIэм медицинэм ылъэ­ныкъокIи шIуагъэ хэлъ. Китаим псыгуIа­нэр лъэшэу щагъашIо. Уц лъэпкъ 200 фэ­диз ащ хашIыкIы, ар зыхэжъукIыгъэ щай ешъох. Къэгъагъэм ыкIэ кофем ычIыпIэ агъэфедэ. Ащ ылъапсэ пхъэ­шъ­хьэ-­мышъхьэм фэдэу агъэлъапIэ, стыры­псым, салатым ахалъхьэ, агъажъэ, агъа­жъо, агъэгъу, IэшIу-­IушIухэр хашIыкIы.
ПсыгуIанэм ылъапси, ыпкъи, итхьапэхэри пшхымэ хъущт, ау тхьапэм кIэу пытыр щэнаут. Къэгъагъэм ыкIэхэр дэжъые цIыкIум ехьыщырых. Щаим ыкIи кофем мэ IэшIу къыхэуным фэшI ар хагъэкIухьэ. Ащ крахмал къыхахы, ихьа­джыгъэ щэламэ хашIыкIы.
Къэгъагъэм шIуагъэу пылъыр къэп­чъыгъуай. ПсыгуIанэр къызэIуихыгъэу плъэгъумэ, идэхагъэ гур къыдещае.
Лъэпшъыкъо Фатим.