Къэлэ зыгъэпсэфыпIэм изэтегъэпсыхьан Адыгэкъалэ щылъагъэкIуатэ. Мы мэфэ жъоркъхэми псэолъэшI IофшIэнхэр щызэ­пыухэрэп.

Гупчэ аллееу метрэ 800 зи­кIыхьагъэм ыбгъукIэ метрэ 450-кIэ мэзым хахьэу зыра­гъэушъомбгъугъ. Непэрэ мафэм ехъулIэу гъогухэр агъэчъыгъэх, тIысыпIэхэр, хэкIитэкъупIэхэр зэбгырагъэуцукIыгъэх, инженернэ рыкIопIэ зэфэшъхьафхэр пхыращых, автомобиль уцу­пIэхэр агъэпсых. Охътэ бла­гъэхэм кIэлэцIыкIу джэгупIэр ашIыщт, камерэ 17 агъэуцущт. ПстэумкIи зыгъэпсэфыпIэм гек­тар 32-рэ зэлъеубыты. Адыгэ­къалэ иадминистрацие иар­хитекторэу Хьатхъохъу Мусрадин къызэриIуагъэмкIэ, зыгъэ­псэфыпIэм ипроект ашIы зэхъум къэлэдэсхэмкIэ нахь Iэ­рыфэгъу зэрэ­хъущтым деплъыгъэх. Джащ фэдэу ежь цIыфхэми яшIоигъо­ныгъэхэр къыдыхалъытагъэх.
«ЗыгъэпсэфыпIэр къалэм ыгузэгути зыдэщыIэр, тэ тыз­фэягъэр псэупIэм исыдырэ чIы­пIи къикIыхэрэмкIэ мыщ къекIолIэнхэр Iэрыфэгъуныр ары. Лъэныкъо пстэухэмкIи къыдэхьашъунхэр, къэкIонхэшъ, зыщагъэпсэфыныр къямыхьы­лъэкIыныр, ашIомычыжьэныр ары. А зэкIэ псынкIагъэп къызэлъыуубытыныр, ау тегугъугъ, — еIо Хьатхъохъу Мусрадин.
ПсэолъэшI IофшIэнхэм адакIо зыгъэпсэфыпIэм игъэдэхэни. ТызыкIуагъэм тефэу IэрышI уцым хэшIыкIыгъэ быгъушхохэм ягъэуцун дэлэжьагъэх. Джы псэушъхьэ джэдитIум чIыпIэр къагъэдахэ ыкIи къэлэдэсхэмкIэ сурэттехыпIэ зэрэхъущтым уеджэнджэшынэу щытэп.

ПстэумкIи гупчэм ишIын Iа­хьиплIэу гощыгъэ. Джы агъэцэкIэрэ псэолъэшI IофшIэнхэр ятIонэрэм къыдыхэлъытагъэх. Шъугу къэдгъэкIыжьын, къэлэ цIыкIухэм язэтегъэпсыхьанкIэ Урысые зэнэкъокъоу лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэ­лъытагъэм Адыгэкъалэ текIоныгъэу къыщыдихыгъэм гупчэм ишIын иамал къытыгъ. Ащ къы­­кIэкIогъэ ахъщэмкIэ илъэс зэ­кIэлъыкIохэм IофшIэнхэр гъэцэ­кIагъэ мэхъух.
«Я 3-рэ IахьымкIэ проектыр дгъэхьазыри, зэнэкъокъум дгъэхьыгъэ. Анахьэу ащ тынаIэ зыщытедгъэтыгъэр дренаж зыфаIорэр ары. ЛъэсрыкIуапIэхэм псыр ащымыуцуным ар фэлэжьэщт. Джащ фэдэу ащ къыхиубытэщт джыри зы дэ­хьапIэм, я 3-м, ишIын. ЯплIэнэрэ IахьымкIэ тимурадыр ­волейболымкIэ, теннисымкIэ джэгупIэхэр тшIынхэр, амфи­театрэр, шхапIэхэр, щапIэхэр зыгъэпсэфыпIэм щыдгъэпсынхэр ары. ЯтIонэрэ Iахьым къы­дыхэлъытэгъэ IофшIэнхэр чъэпыогъум и 1-м ехъулIэу къэтыухыщтых», — къытфиIотагъ архитекторым.

Адыгэкъалэ изыгъэпсэфыпIэ непэ цIыфыбэм якIуапI. Лъэгъупхъэу, чIыпIэшIоу яIэ хъугъэм цIыфхэм яуахътэ щагъэкIоныр якIас. Анахьэу пчэдыжьрэ ыкIи пчыхьэрэ ахэр жъугъэу мыщ щызэблэкIых. Къалэм имызакъоу, гъунэгъу псэупIэхэми къарэкIыхэшъ къы­щакIухьанэу къэкIох. ГущыIэм пае, Хъут Зульфия Адыгэкъалэ пэблагъэу мэпсэу. ЗыгъэпсэфыпIэр зашIыгъэм къыщегъэ­жьагъэу къэкIонышъ, къыщикIу­хьаныр икIас.
«Ары, бэрэ тыкъэкIо. Тигуап мыщ фэдэу дахэу зэрашIыгъэр. Сабыйхэри къэтэщэх. Нэжъ-Iужъхэми агу рехьы, къы­щакIухьэ», — еIо ащ.

НепэкIэ Адыгэкъалэ изыгъэ­псэфыпIэ цIэ иIэгоп. Ащ икъы­хэхынкIэ къэлэ администрацием мазэкIэ узэкIэIэбэжьмэ зэ­нэкъокъу зэхищагъ. Хэлажьэ зышIоигъохэр инэкIубгъоу http://adigeisk зыфиIо-
рэм хэхьанхэшъ шапхъэхэр зэрагъэшIэнхэ алъэкIыщт. Уахътэу къэнагъэр макIэ, зэнэкъо­къур ыкIэм фэкIо.
Анцокъо Ирин.
Сурэтхэр: Iэшъынэ Аслъан.