Адыгеим и ЛIышъхьэу КъумпIыл Мурат псэу­пIэ-коммунальнэ хъыз­мэтым ипсэуалъэхэм ыкIи непэ фэдэ лъэхъаным, энергием икъэ­кIуапIэхэм яIофшIэн нахь гумэкIыгъохэр къытыхэ зыщыхъугъэм, предприятиехэм яIоф­шIэн зэрэзэхащэрэм иIофыгъохэм япхыгъэ зэIукIэ зэхищагъ.

АР-м иминистрэхэм я Кабинет итхьаматэу КIэрэщэ Анзаур, АР-м псэолъэшIынымкIэ, транспортымкIэ, унэ-­коммунальнэ ыкIи гъогу хъызмэтымкIэ иминистрэу Валерий Картамышевыр, экономикэ хэхъоныгъэмкIэ министрэу Шэуджэн Заур, республикэм имуниципальнэ образованиехэм япащэ­хэр, энергием икъэкIуапIэхэм афэгъэзэгъэ организациехэм яIэшъхьэтетхэр ащ хэлэжьагъэх.
АР-м и ЛIышъхьэ зэ­IукIэр къызэIуихызэ анаIэ тыраригъэдзагъ унэ-коммунальнэ хъызмэтым фэIо-фа­шIэхэр шапхъэхэм алъыкIимыгъахьэу зэ­ригъэцакIэхэрэм къыхэкIэу цIыфхэм къагъэхьыгъэ тхьау­сыхэ тхылъхэм икъоу анаIэ атырагъэтын зэрэфаер. А тхьау­сыхэ тхылъхэм ащы­щыбэр зэпхыгъэр жъугъэу электричест­вэр паупкIы зэ­рэ­хъугъэр ыкIи ащ къыхэкIэу цIыф псэу­пIэхэм ащыщхэм псы къабзэр икъоу зэраIэкIэмыхьэрэр ары.

АР-м и ЛIышъхьэ муниципалитетхэм япащэхэм пшъэрылъ афишIыгъ цIыфхэр зыгъэгумэкIырэ лъэныкъо гъэнэфагъэхэм язэшIохын икъоу анаIэ тыра­гъэтынэу. Тэхъутэмыкъое, Теу­цожь ыкIи Мыекъопэ районхэм къэлэгъэпсыкIэ зиIэ псэупIэу Яблоновскэм яIэшъхьэтетхэм Iофтхьабзэу зэрахьэхэрэм афэгъэхьыгъэу къаIотагъ. Тэхъутэмыкъое районым ипсэупIэу Новэм дэсхэм псыр зэраIэ­кIахьэрэм фэгъэхьыгъэ тхьаусыхэ тхылъэу къатыгъэхэм шъхьафэу защагъэгъозагъ.
«ЦIыфхэм ялъэIу тхылъхэм псынкIэу анаIэ атырадзэн, ахэм япхыгъэ Iоф­тхьабзэхэр игъом зэрахьанхэ, псыр зыпкъ итэу аIэкIэхьаным анаIэ тырагъэтын фае. Джырэ фэдэ фэбэшхом псы ямыIэу цIыфхэр къэдгъанэхэ хъущтэп — ар пшъэдэкIыжьынчъагъэ хъущт!
Хэбзэ къулыкъухэм игъом а Iофыгъохэр зэшIуахынхэ фае, Iофэу ашIэрэм икIэуххэр цIыф­хэми къалъэгъущтых. ПсэупIэу Новэм дэсхэм непэ блэмыкIэу зэIукIэгъу адэшъушI, Iофыгъоу къэуцугъэм изэшIохынкIэ лъэныкъо зэфэшъхьафэу щыIэхэр игъо афэшъулъэгъух. ЗэкIэми апэу шIэгъэн фаер — дизель генераторхэр гъэуцугъэнхэр, ятIонэрэр — зэшъощтхэ ыкIи техническэ псыр къафэщэгъэныр. Непэ къыщегъэжьагъэу бутилированнэ псыр цIыфхэм афэжъугощынэу ежъугъажь. ЗэкIэ муниципалитетхэм ар афэгъэхьыгъэу щыт, цIыфхэм ятхьаусыхэ тхылъхэм псынкIэу джэуап чIыпIэ къулыкъухэм аратыжьын ыкIи Iофыгъохэу къэуцухэрэр зэшIуахын фае», — къыхигъэщыгъ КъумпIыл Мурат.
Федеральнэ проектэу «Псы къабзэр» зыфиIоу лъэпкъ проектэу «ПсэупIэмрэ къэлэ щы­IакIэмрэ» къыхиубытэрэм игъэ­цэкIэни хэплъагъэх.
2019-рэ илъэсым къыщыублагъэу 2023-рэ илъэсым нэс Адыгеим иму­ниципальнэ обра­зованиехэм псым епхыгъэ псэолъэ 27-рэ ащатIупщыгъ. Мы илъэсым джыри псэолъи 6-мэ япхыгъэ IофшIэныр макIо.
АР-м псэолъэшIынымкIэ и Ми­нистерствэ къызэритыгъэмкIэ, Iо­ныгъом ехъулIэу псыкъэкIуапIэхэм япхыгъэ Iофтхьа­бзэхэр ыкIэм нагъэсыщтых, илъэсэу къихьащтым те­гъэпсыхьэгъэ про­граммэм зэрэ­хэлэжьэщтхэмкIэ лъэIу тхылъхэр агъэхьазырых.
Ащ нэужым энергием икъэ­кIуапIэхэм алъэныкъокIэ Мые­къуапэ иIофхэм язытет зыфэдэ хъугъэм къытегущыIагъэх къалэм ипащэу Геннадий Митрофановыр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мые­къопэ ТЭЦ-р» зыфиIорэм игенеральнэ пащэу Юрий Каверзневыр. ЗэдэгущыIэгъум къыхэлэжьагъ Iахьзэхэлъ обществэу «Россети Кубань» зыфиIорэм икъутамэ ипащэу Дмитрий Рязанцевыр, техническэ Iофы­гъохэмкIэ генеральнэ пащэм игуадзэу, «Россети Кубань» зыфиIорэм иинженер шъхьаIэу Владимир Михайловыр. Адыгеим и ЛIышъхьэ шъолъыр къутамэм зэрэфэразэр къыIуагъ обществэу «Мыекъопэ ТЭЦ-р» зыфиIорэм къыритырэ IэпыIэгъум пае.
Авариехэр амал зэриIэкIэ нахь псынкIэу дэгъэзыжьыгъэнхэмкIэ, къэлэ электрическэ хъытыухэр гъэцэкIэжьыгъэнхэмкIэ ренэу ащ ынаIэ къатырегъэты.

КъызэрэхагъэщыгъэмкIэ, Урысыем и Къыблэ иэнерго­системэ къытегъэкIагъэр бэ зэрэхъугъэм къыхэкIэу пIэлъэ гъэнэфагъэкIэ къызыфагъэфе­дэщт IофшIакIэм тыращэх. Электрикэ хъытыухэр жъы зэ­рэхъугъэхэм иIофыгъо зэшIо­хыгъэным пае мы лъэхъаным предприятием инвестиционнэ программэ къыгъэхьазырыгъ, ар илъэси 5-у къыкIэлъыкIощтым телъытагъэу щыт. АР-м и ЛIышъхьэ обществэу «Мые­къопэ ТЭЦ-м» джыри зэIукIэ дашIынэу, социальнэ псэуа­лъэхэм генераторхэр икъоу яIэ­хэмэ ауплъэкIунэу пшъэрылъ афишIыгъ.
Адыгеим и ЛIышъхьэ джащ фэдэу цIыф­хэм ятхьаусыхэ тхылъхэм игъом анаIэ атырадзэнышъ, Iофтхьабзэу зэра­хьагъэхэмкIэ мафэ къэс зэшIуахыгъэр къаIонэу зэIукIэу муниципалитетхэм ащызэхащэхэрэр зэкIэ анахь зигъоIофыгъохэу республикэм исхэр зыгъэ­гумэкIыхэрэм япхы­гъэ Iофтхьабзэу зэрахьэхэрэмкIэ аублэнхэу къафигъэ­пытагъ.
ЦIыфхэм икъоу къэбар тэрэзыр аIэкIэгъэхьэгъэныр анахь пшъэрылъ шъхьаIэхэм зэращыщыр ащ къыIуагъ.
Адыгэ Республикэм
и ЛIышъхьэ
ипресс-къулыкъу
къытыгъэ къэбархэмкIэ
Тхьаркъохъо Сафыет.
Сурэтхэр: А. Гусев.