Бэдзэогъум къыщегъэжьагъэу къэралыгъо фондэу «Хэгъэгум иухъумакIохэр» зыфиIорэм иIофшIэн зэхъокIыныгъэ фэхъугъ.

ЗэкIэ ащ икъутамэхэр, Адыгеим щыIэри ахэтэу, мэфибл IофшIэгъу шIыкIэм техьагъэх. Джы зыгъэпсэфыгъо ямыIэу мафэ къэс хэушъхьафыкIыгъэ дзэ операцием иветеранхэм ыкIи ахэм яунагъохэм яфэIо-фашIэхэр афагъэцэкIэщтых.
— Зыкъызэрэтфагъазэрэм ипчъагъэ зэпымыоу къыхэхъо. Ащ къеушыхьаты цIыфхэм фондым цыхьэ зэрэфашIырэр. ЛъэIоу къытахьылIэхэрэм янахьыбэм мэхьанэ яI ыкIи псынкIэу зэшIопхынхэ фае – сымэджэщхэм ачIэгъэгъолъхьэгъэнхэр, протезхэр афягъэшIыгъэныр, тхылъхэм ягъэпсын. Ветеранхэм, ахэм яунагъохэм ящыкIэгъэ IэпыIэгъур Iэрыфэгъоу ягъэгъотыгъэнэу щыт, — щыхагъэ­унэфыкIыгъ фондым.